“Pensiyangiz keyingi oydan oshiriladi” – bu yolg‘on!  

O‘zbekistonda firibgarlar notanish raqamlardan pensionerlarga qo‘ng‘iroq qilishi holati kuzatilmoqda. Bu haqda Pensiya jamg‘armasi ma’lum qildi.  

Jamg‘armaga ko‘ra, ayni kunlarda telefon orqali pensiya yoshidagi fuqarolarga notanish raqamlar orqali qo‘ng‘iroq qilinib, ularning bank plastik kartasi yoki pasport ma’lumotlarini so‘rash holatlari uchramoqda. Firibgarlar o‘zini bank yoki Pensiya jamg‘armasi xodimi sifatida tanishtiryapti.

Ya’ni ular “Pensiyangiz keyingi oydan oshiriladi. Buning uchun ma’lumotlaringizni va telefoningizga kelgan kodni aytsangiz, pensiyangiz kartangizga tushadi, bo‘lmasa oshmay qoladi”, degan ma’noda yolg‘on xabar orqali pensionerlarning ishonchiga kirishga urinmoqda. 

“Pensiya jamg‘armasi xodimlari hech qachon sizga qo‘ng‘iroq qilib, shaxsiy ma’lumotlaringizni yoki telefoningizga kelgan kodlarni so‘ramaydi”, deyiladi xabarda.

Jamg‘arma pensionerlardan pasport, plastik karta yoki JShShIR raqami kabi shaxsiy ma’lumotlarni begona shaxslarga taqdim etmaslikni so‘ramoqda. Agar shu kabi shubhali holatlar uchrasa, Pensiya jamg‘armasining 1271 qisqa raqamli ishonch telefoniga yoki ichki ishlar organlariga xabar berish tavsiya etilgan.

Avvalroq firibgarlar MIB nomidan ham fuqarolarga ijro hujjati yoki qarzdorlik haqida soxta xabar jo‘natib, tuzoq qurgandi.