Bloomberg: YeI Rossiyaning Ukrainaga yangi hujumidan xavotirda

Yevropa yetakchilari Ukraina prezidenti Volodimir Zelenskiy bilan o‘z mamlakati uchun xavfsizlik kafolatlarini muhokama qilish uchun uchrashuv chog‘ida Rossiyaning Ukrainaga yangi hujumi ehtimolidan xavotir bildirdi. O‘tgan hafta Tulonda bo‘lib o‘tgan Xavfsizlik kengashi yig‘ilishida Germaniya va Fransiya rasmiylari Donetsk viloyati sharqidagi Pokrovsk yaqinida rus qo‘shinlari to‘planayotgani masalasini muhokama qildi, deb xabar berdi Bloomberg agentligi manbalarga tayanib.

O‘tgan hafta Zelenskiyning o‘zi aytganidek, Rossiya 100 mingga yaqin askarini Pokrovsk tashqarisidagi frontga ko‘chirdi, deb yozadi agentlik. Rossiya qo‘shinlari bir yildan ortiq vaqt davomida shaharni o‘rab olishga va egallashga urinmoqda. «Pokrovskning qo‘lga olinishi Rossiyaning Kramatorsk va Slavyansk kabi yirik shaharlarga hujumi uchun yo‘l ochadi, chunki Moskva butun Donetsk viloyati ustidan nazorat o‘rnatishga harakat qilmoqda», deb tushuntiradi Bloomberg.

«Rossiyaning yozgi mashaqqatli hujumi hozircha Kreml uchun muhim hududiy yutuqlar olib kelmadi. Moskva qo‘shinlari sekin-sekin olg‘a siljib, may va avgust oylari orasida 2033 kvadrat kilometr yoki Ukraina umumiy hududining 0,3 foizini egallab oldi», deyiladi maqolada.