Kiyev yana raketa hujumiga uchradi

Rossiya 14 iyulga o‘tar kechasi Ukraina poytaxti Kiyevga raketa va ballistik qurollar yordamida hujum uyushtirdi. Shaharning bir nechta tumanida yong‘inlar kelib chiqdi, maktab binosi yaqinida katta chuqurlik hosil bo‘ldi. Ukraina havo mudofaa tizimlari hujumni qaytarish uchun ishga tushirildi.

Foto: AP

Kiyev shahar hokimi Vitaliy Klichkoning ma’lum qilishicha, hujum vaqtida poytaxtda havo hujumidan mudofaa (HHM) tizimlari faoliyat yuritgan.

Uning so‘zlariga ko‘ra, Goloseyev tumanida ikki manzilda omborxonalarga zarba tekkan. Buning oqibatida yong‘inlar yuzaga kelgan.

Darnitsa tumanida esa raketa parchalari ochiq hududga tushgan va bir nechta avtomobilga o‘t ketgan.

Kiyev shahar harbiy ma’muriyati rahbari Timur Tkachenko ma’lum qilishicha, Darnitskiy tumanida maktab binosi yonida katta chuqurlik hosil bo‘lgan. Maktab binolarining oynasi singan, biroq inshootning o‘ziga jiddiy zarar yetmagan. Shu bilan birga, ushbu hududda ham avtomobillar yongani qayd etilgan.

Ukraina Qurolli kuchlari Havo kuchlari Rossiya tomonidan poytaxtga qarshi amalga oshirilgan hujumni tasdiqladi.

Ayni paytda hujum oqibatida halok bo‘lganlar yoki jarohatlanganlar haqida rasmiy ma’lumot berilmagan.

Shu bilan birga, 13 iyul kuni Fransiya prezidenti Emmanuel Makron Parijda Ukraina prezidenti Volodimir Zelenskiy bilan o‘tkazgan qo‘shma matbuot anjumanida Ukrainaga yangi avlod SAMP/T zenit-raketa majmualari yetkazib berilishini ma’lum qildi. Uning aytishicha, bu majmualar Ukrainaning havo mudofaa salohiyatini mustahkamlashga xizmat qiladi.

Bundan tashqari, Fransiya va Ukraina Kiyev uchun 16 ta Rafale qiruvchi samolyotini xarid qilish bo‘yicha «yo‘l xaritasi»ni kelishib oldi. Samolyotlar 2028–2029 yillarda Ukraina havo hududida xizmatni boshlashi rejalashtirilgan. Shuningdek, Ukrainaga zamonaviy radiolokatsiya tizimlari ham yetkazib berilishi ko‘zda tutilgan.