Finlandiya urushdan qochgan rossiyaliklarni ommaviy ravishda chiqarib yubormoqda

Finlandiya hukumati Rossiyaning Ukrainaga qarshi urushi boshlanganidan keyin bu davlatga qochgan rossiyaliklarni ommaviy ravishda chiqarib yuborishni boshladi. 2025 yilning yanvaridan sentabriga qadar boshpana berish rad etilgan 104 nafar Rossiya fuqarosi Finlandiyadan chiqarib yuborildi, deb xabar qildi Finlandiya politsiyasi 5 sentabr, juma kuni «Vot Tak» nashriga. Bu yil deportatsiya qilinganlar sonining ko‘payishi rossiyaliklarning boshpana so‘rovi uzoq vaqt davomida ko‘rib chiqilmagani bilan bog‘liq.

«Ikki yil davomida hech kim bilan suhbat qilinmadi. Ular biz bilan nima qilishni bilmadi. Faqat kamdan-kam holatlar kuzatildi. Faollarimiz Finlandiya ombudsmaniga murojaat qildi, shikoyatlar yozdi va faqat 2024 yilning oxirida suhbatlar boshlandi», dedi «Kemi urushga qarshi» tashkiloti faoli va sobiq ko‘ngilli Maksim Aliyev. Uning so‘zlariga ko‘ra, birinchi intervyulardan keyin rossiyaliklarning deyarli 90 foizi rad etilgan. Ularning aksariyati Oliy sudga apellyatsiya arizasi bilan murojaat qilgan va agar ruxsat berilsa, boshpana so‘rab qayta murojaat bilan chiqadi.

Rad etishlarning ko‘pligi, aksariyat hollarda arizachilarning safarbarlikdan qochish uchun Rossiyadan qochib ketganligi bilan bog‘liq. 2023 yil may oyida Finlandiya Migratsiya xizmati kamida 1109 nafar rossiyalik harbiy xizmatga chaqirishdan bo‘yin tovlagani sababli boshpana so‘ragani haqida xabar bergan edi. Finlandiya rasmiylari ularni rad etib, Rossiyada safarbarlik tugaganini da’vo qilmoqda. Qarorlarda bu haqda o‘sha paytdagi mudofaa vaziri Sergey Shoygu va prezident Vladimir Putin aytgani aytiladi. Biroq, tegishli farmon imzolanmagan.