Iyul-avgust oylarida elektromobil importida “bum” kuzatildi

Iyul-avgust oylarida O‘zbekistonga elektromobil importi keskin oshdi. Kun.uz e’tibor qaratgan Bojxona qo‘mitasi statistikasi shundan darak bermoqda.

Qo‘mita saytidagi ochiq ma’lumotlarga ko‘ra, 2025 yilning dastlabki 6 oyi davomida 14 355 dona elektromobil olib kirilgan bo‘lsa, shundan keyin iyul-avgust oylarida undan ham ko‘proq – 14 593 ta elektrokar import qilingan.

Benzinda harakatlanadigan va gibrid modellar importi bo‘yicha raqamlarda bunday anomaliya ko‘zga tashlanmaydi.

Yanvar–avgust oylarida benzinda yuradigan mashinalarga qaraganda 2,5 barobarga ko‘p elektrokar olib kirilgani e’tiborli. Yengil mashinalar importida faqat benzinda harakatlanadigan modellarning ulushi 26 foizga tushib qolgan. Xorijdan keltirilgan yengil mashinalarning 69 foizi faqat elektr dvigateli bilan jihozlangan.

Gibrid modellar borgan sari bozorni tark etmoqda: bunday ulovlar importi yillik nisbatda 5 barobarga qisqargan.

2025 yilning dastlabki 8 oyida jami 42 230 ta yengil avtomobil olib kirilgan bo‘lib, bu – o‘tgan yilning mos davri (47 928 ta)ga nisbatan 11,9 foizga kam.