Germaniya va Fransiya Markaziy Osiyodagi banklarga nisbatan sanksiyalarni kuchaytirishga chaqirdi

Germaniya va Fransiya Yevropa Ittifoqining yangi, 19-sanksiya paketi doirasida Rossiyaning "Lukoyl" neft kompaniyasi va uning Litasco shu’ba korxonasiga qarshi sanksiyalar kiritishni taklif qildi. Bu haqda diplomatlarga tayanib, AFP agentligi xabar berdi.

Agentlik manbalariga ko‘ra, bu taklif Yevropa komissiyasiga o‘tgan haftada kiritilgan. Sanksiyalar ro‘yxatiga Rossiya neftini Yevropa Ittifoqiga eksport qilish bilan shug‘ullanuvchi uchinchi mamlakatlardagi neftni qayta ishlash zavodlari va Rossiya nefti bilan ishlaydigan savdo kompaniyalarini kiritish tavsiya etiladi. Bundan tashqari, Germaniya va Fransiya Markaziy Osiyodagi banklar va kriptovaluta birjalariga nisbatan sanksiyalarni kuchaytirishga chaqirdi.

Dpa agentligi tomonidan ko‘rib chiqilgan hujjatda aytilishicha, neft va gaz sotish Rossiyaning Ukrainaga qarshi urushini moliyalashtirishning asosiy manbai hisoblanadi.