AQSh sudi Trampning The New York Times'ga qarshi da’vosini vaqtinchalik rad etdi

19 sentabr, juma kuni Florida sudi AQSh prezidenti Donald Trampning The New York Times gazetasiga qarshi ko‘p milliard dollarlik da’vosini vaqtinchalik rad etdi. Sudya Stiven Merridey buni 85 sahifalik shikoyat juda uzun va protsessual talablarga javob bermasligi bilan izohladi.

Merridey da’vo arizasi «aniq, to‘g‘ridan to‘g‘ri va cheklangan» bo‘lishi kerakligini ta’kidladi va kelajakdagi hujjatni 40 sahifa bilan chekladi. Uning so‘zlariga ko‘ra, «shikoyat piar uchun megafon, ishtiyoqli nutqlar uchun tribuna yoki Hayd-parkdagi notiqlar burchagiga teng keladigan narsa emas».

Shu hafta boshida Oq uy rahbari The New York Times va uning bir qancha jurnalistlariga tuhmat yuzasidan da’vo arizasi berganini e’lon qildi. Uning ta’kidlashicha, nashr «qasddan va g‘arazli tarzda» uni 2024 yilgi saylovlar oldidan obro‘sizlantirishga uringan. Prezident yetkazilgan zararni 15 milliard dollarga baholadi.