G‘azo sektoridagi urush mamlakatni tan olish jarayonini tezlashtirdi – Falastin TIV

Falastin tashqi ishlar vaziri o‘rinbosari Umar Avadalla G‘azo sektoridagi urush tufayli xalqaro hamjamiyat tomonidan mamlakat davlatchiligini tan olish jarayoni tezlashganini aytdi.

Foto: AP

«Falastin davlatining tan olinishi ko‘p yillik diplomatik faoliyat davomida to‘plangan va rivojlangan jarayon natijasidir. Bundan tashqari, bu e’tiroflar Falastin xalqiga qarshi genotsid va Isroilning G‘arbiy qirg‘oqdagi, jumladan, Quddusdagi Falastin xalqi huquqlariga tajovuzlari fonida sodir bo‘lmoqda», dedi Umar Avadalla.

Uning qo‘shimcha qilishicha, Falastinning yana bir qancha davlatlar tomonidan tan olinishi «ikki davlat to‘g‘risidagi qarorni amalga oshirish yo‘lidagi eng jiddiy amaliy qadam» bo‘ldi. Shuningdek, u «Falastin davlati bo‘lmagan yangi Yaqin Sharqning yaratilishi sarobga aylanganini» aytdi.

Avvalroq Buyuk Britaniya, Kanada va Avstraliya rasmiylari Falastin davlatini tan olganini ma’lum qilgandi. Shunga o‘xshash qaror yaqin orada Fransiya hukumati tomonidan qabul qilinishi kutilmoqda. Sanab o‘tilgan davlatlardan tashqari, Falastinni BMTga a’zo 193 davlatdan yana 147 tasi tan olgan.