«Oltin narxi oshishi bilan dollar kursi pasayishi o‘rtasida bog‘liqlik yo‘q» - Markaziy bank

Markaziy bank oltin narxining oshishi o‘zbek so‘mining dollarga nisbatan mustahkamlanishi bilan bog‘liqligini rad etdi. Bu haqda 19 sentabr kuni bo‘lib o‘tgan media-muloqotda regulyatorning Xalqaro rezervlarni boshqarish departamenti rahbari Sanjar Valiyev ma’lum qildi, deya xabar berdi Spot.

«Oltin-valuta zaxiralari xorijiy valutada shakllantirilgani sababli [oltin narxining oshishi va dollar kursi o‘rtasida] korrelyatsiya mavjud emas. So‘mga hech qanday aloqasi yo‘q. E’lon qilinadigan statistikada zaxiralar hajmi AQSh dollarida aks ettiriladi. Bu yerda so‘mning ishtiroki yo‘q», degan Valiyev.

Eslatib o‘tamiz, 2025 yilning 8 oyida O‘zbekiston 8,4 mlrd dollarlik oltin eksport qildi. Bu qiymat jihatdan o‘tgan yilning mos davriga nisbatan 68,5 foizga ko‘p.

Avvalroq, AQSh dollarining so‘mga nisbatan Markaziy bank belgilagan qiymati 24 oylik minimumni qayd etgani va 12 200 so‘mdan pastga tushgani xabar qilingandi.