Polsha Belarus bilan chegarasini qayta ochdi

25 sentabr, payshanbaga o‘tar kechasi Polsha «Zapad-2025» Rossiya-Belarus harbiy mashg‘ulotlari tufayli taxminan ikki hafta davomida yopilgan Belarus bilan chegara punktlarini qayta ochdi.

Belarus vaqti bilan soat 01:00 da harakat qayta ochildi. Terespol-Brest chegara punkti (avtomobillar uchun), Kukuriki-Kozlovichi chegara punkti (yuk avtomobillari uchun) va uchta temiryo‘l o‘tish joylari qayta ochildi. Biroq, boshqa chegara punktlari yopiqligicha qolmoqda.

Belarusning Onliner nashri Telegramʼda soat 01:20 da chegarani kesib o‘tgan birinchi transport vositasi aniqlangani haqida xabar berdi. «Mana, Polsha tomonidan kirib kelgan birinchi avtomobil. Qizig‘i shundaki, unda Polsha raqamlari bor», — deyiladi xabarda. Bu «hech bo‘lmaganda Brest-Terespol yo‘l kesishmasida» chegaraning qayta ochilishini tasdiqladi.

Polsha bir tomonlama tartibda Belarus bilan chegarasini 12 sentabrga o‘tar kechasi butunlay yopib qo‘ydi. Uch kun avval bu qarorni e’lon qilar ekan, Polsha bosh vaziri Donald Tusk buni Belarus hududida 12 sentabrdan 16 sentabrga qadar «harbiy doktrina nuqtai nazaridan juda agressiv» «Zapad-2025» manyovrlari o‘tkazilishi bilan bog‘ladi.