Aliyev turkiy davlatlarga qo‘shma harbiy mashg‘ulotlar o‘tkazishni taklif qildi

Ozarboyjon prezidenti Ilhom Aliyev Turkiy davlatlar tashkilotiga (TDT) a’zo mamlakatlarga 2026 yilda harbiy mashg‘ulotlar o‘tkazishni taklif qildi. Uning so‘zlaridan «Azertaj» agentligi iqtibos keltirdi.

U turkiy davlatlar bir vaqtning o‘zida bir nechta sohalarda, jumladan, harbiy va mudofaa sohalarida keng hamkorlik qilayotganini eslatdi.

«2026 yilda Ozarboyjonda Turkiy davlatlar tashkilotiga a’zo davlatlarning qo‘shma harbiy mashg‘ulotlarini o‘tkazishni taklif qilamiz», dedi u.

O‘z navbatida, TDT bosh kotibi Kubanichbek Omuraliyev birlashma negizida harbiy blok tuzilishini rad etdi.

Buning o‘rniga, bosh kotibning ta’kidlashicha, turkiy mamlakatlar o‘rtasidagi hamkorlikning yangi formati – TDT+ tasdiqlanadi. U tashkilotga a’zo bo‘lmagan davlatlar bilan hamkorlikni rivojlantirishni nazarda tutadi.

«Men darhol ta’kidlamoqchiman - gap ba’zi jurnalistlar talqin qilmoqchi bo‘lganidek, qandaydir yopiq yoki harbiy blok haqida ketmayapti. Bu noto‘g‘ri», dedi bosh kotib.

Ozarboyjonda TDT 12-sammiti bo‘lib o‘tmoqda. Tashkilotga Ozarboyjondan tashqari Qozog‘iston, Qirg‘iziston, Turkiya va O‘zbekiston ham kiradi. Turkiya NATO a’zosi hisoblanadi.