Moskva formati ishtirokchilari Afg‘onistondagi xorijiy harbiy bazalarga qarshi chiqdi

Afg‘oniston bo‘yicha maslahatlashuvlarning Moskva formatiga (MMF) a’zo davlatlar ushbu mamlakatda uchinchi davlatlarning harbiy ishtirokiga qarshi chiqdi. Bu haqda 7 oktyabr kuni Rossiya poytaxtida bo‘lib o‘tgan MMF yig‘ilishi yakunlari bo‘yicha qabul qilingan qo‘shma bayonotda aytiladi.

«Mamlakatlarning Afg‘oniston va unga qo‘shni davlatlarda o‘z harbiy infratuzilma obektlarini joylashtirishga urinishlari nomaqbul deb topildi, chunki bu mintaqaviy tinchlik va barqarorlik manfaatlariga mos kelmaydi», deyiladi bayonotda.

Qaysi mamlakatlar Afg‘onistonda harbiy infratuzilma obektlarini joylashtirishga urinayotganiga aniqlik kiritilmadi. Avvalroq, AQSh prezidenti Donald Tramp Afg‘onistondagi Bagrom aviabazasini qaytarish niyatida ekanini ma’lum qilgandi.

Moskva formatidagi yig‘ilishda birinchi marta Afg‘oniston delegatsiyasi to‘laqonli ishtirokchi sifatida qatnashdi, unga «Tolibon» hukumatidagi tashqi ishlar vaziri Amir Xon Muttaqiy boshchilik qildi. Ishtirokchilar orasida an’anaviy ravishda Rossiya, Hindiston, Eron, Qozog‘iston, Xitoy, Qirg‘iziston, Pokiston, Tojikiston va O‘zbekiston vakillari bor edi. Mehmon sifatida zalda Belarus delegatsiyasi bo‘ldi.