“Kredit jadvali o‘zgarsa, qarzdorga darhol yangisini bering” – Markaziy bank tijorat banklarini ogohlantirdi

Aniqlanishicha, ba’zi banklar kredit to‘lov jadvalidagi sana, muddat yoki miqdor o‘zgarganda, mijozga o‘z vaqtida xabar bermayapti. Ular yangilangan to‘lov jadvalini faqat mijoz so‘ragandagina taqdim etmoqda. Markaziy bankning ta’kidlashicha, bunday ma’lumotlar zudlik bilan mijozga oldindan yetkazilishi shart.

Kreditni qaytarish jadvallari — kredit shartnomasining ajralmas qismi hisoblanadi. Unda kredit qoldig‘i, asosiy qarz va foiz to‘lovlari hamda ularning amalga oshirilish sanalari ko‘rsatib o‘tiladi. Jadvaldagi har qanday o‘zgarish kredit shartlari o‘zgarishiga teng, deyiladi regulyator ogohlantirishida.

Markaziy bank agar mijoz yangilangan jadvaldan bexabar qolsa, to‘lovni kechiktirib yuborishi, natijada jarima, ortiqcha foizlar yoki kredit tarixining yomonlashuvi kabi oqibatlar kelib chiqishi mumkinligini bildirgan.

Shundan kelib chiqib, banklardan kredit shartnomalariga bunday shartlar kiritish amaliyotini to‘xtatish talab qilindi. Regulyator ilgari tuzilgan shartnomalarga ham o‘zgartirish kiritilib, bunday noqonuniy bandlar bekor qilinishi lozimligini eslatgan.

Kreditni qaytarish jadvalida har qanday o‘zgarish bo‘lgan taqdirda bank qarzdorga yangilangan jadvalni darhol taqdim etishi kerak, deyiladi Markaziy bank axborotida.