Dohaga berilgan zarba G‘azoda sulh tuzish yo‘lidagi burilish nuqtasi bo‘ldi – OAV

Isroilning bir oy oldin Qatar poytaxtiga bergan zarbasi AQSh diplomatiyasining kuchayishiga olib keldi, natijada G‘azo sektorida o‘t ochishni to‘xtatdi, deb yozdi Politico manbalarga tayanib.

Isroil Qatar poytaxti Dohaga 9 sentabr kuni zarba berdi. Isroil armiyasi bunda 2023 yil 7 oktyabrdagi hujumga rahbarlik qilgan HAMAS vakillari o‘z nishoni bo‘lganini ma’lum qildi. Guruh o‘z a’zolaridan besh kishi, jumladan, harakat bosh muzokarachisining o‘g‘li, shuningdek, Qatar xavfsizlik xizmati xodimi halok bo‘lganini aytdi. Politico xabariga ko‘ra, hujumdan so‘ng Doha G‘azo bo‘yicha vositachilikdan voz kechish bilan tahdid qilgan.

Hujumni amalga oshirgan Isroil Qatarni «terrorchilarni yashirishda», Qatar esa Isroilni «qo‘rqoq hujum»da aybladi. Shunga qaramay, sentabr oyi oxirida Isroil bosh vaziri Binyamin Netanyahu Dohadan uzr so‘radi.

«Isroilning Qatarga muvaffaqiyatsiz zarbasi burilish nuqtasi bo‘ldi», dedi nashrning Oq uyga yaqin suhbatdoshi. Uning so‘zlariga ko‘ra, AQSh prezidenti Donald Tramp bundan Netanyahuga bosim o‘tkazish uchun «dastak sifatida» foydalangan, u oxir-oqibat nafaqat Qatardan kechirim so‘ragan, balki urushni to‘xtatishga ham rozi bo‘lgan.

«Prezident [Tramp] ancha qat’iyatli va keskin bo‘lib qoldi va Dohaga berilgan zarbadan keyin tinchlik kelishuviga erishish uchun shoshildi. Bu prezidentga Isroilga maksimal bosim o‘tkazish imkonini berdi va u buni amalga oshirdi. Va bu haqiqatan ham Isroilni sulhga rozi bo‘lishga majbur qilgan holatga keltirdi», deb tushuntirdi Oq uyning ismi oshkor etilmagan yuqori martabali mulozimi.

G‘azo sektoridagi sulh 10 oktyabrdan kuchga kirdi. Birinchi bosqichda HAMAS sektorda qolgan isroillik asirlarni ozod qilishi, Isroil esa falastinlik mahbuslarni ozod etishi va mintaqadagi qo‘shinlarini kelishilgan chiziqlarga olib chiqishi kerak.