Доҳага берилган зарба Ғазода сулҳ тузиш йўлидаги бурилиш нуқтаси бўлди – ОАВ

Исроилнинг бир ой олдин Қатар пойтахтига берган зарбаси АҚШ дипломатиясининг кучайишига олиб келди, натижада Ғазо секторида ўт очишни тўхтатди, деб ёзди Politico манбаларга таяниб.

Исроил Қатар пойтахти Доҳага 9 сентябр куни зарба берди. Исроил армияси бунда 2023 йил 7 октябрдаги ҳужумга раҳбарлик қилган ҲАМАС вакиллари ўз нишони бўлганини маълум қилди. Гуруҳ ўз аъзоларидан беш киши, жумладан, ҳаракат бош музокарачисининг ўғли, шунингдек, Қатар хавфсизлик хизмати ходими ҳалок бўлганини айтди. Politico хабарига кўра, ҳужумдан сўнг Доҳа Ғазо бўйича воситачиликдан воз кечиш билан таҳдид қилган.

Ҳужумни амалга оширган Исроил Қатарни «террорчиларни яширишда», Қатар эса Исроилни «қўрқоқ ҳужум»да айблади. Шунга қарамай, сентябр ойи охирида Исроил бош вазири Бинямин Нетаняҳу Доҳадан узр сўради.

«Исроилнинг Қатарга муваффақиятсиз зарбаси бурилиш нуқтаси бўлди», деди нашрнинг Оқ уйга яқин суҳбатдоши. Унинг сўзларига кўра, АҚШ президенти Доналд Трамп бундан Нетаняҳуга босим ўтказиш учун «дастак сифатида» фойдаланган, у охир-оқибат нафақат Қатардан кечирим сўраган, балки урушни тўхтатишга ҳам рози бўлган.

«Президент [Трамп] анча қатъиятли ва кескин бўлиб қолди ва Доҳага берилган зарбадан кейин тинчлик келишувига эришиш учун шошилди. Бу президентга Исроилга максимал босим ўтказиш имконини берди ва у буни амалга оширди. Ва бу ҳақиқатан ҳам Исроилни сулҳга рози бўлишга мажбур қилган ҳолатга келтирди», деб тушунтирди Оқ уйнинг исми ошкор этилмаган юқори мартабали мулозими.

Ғазо секторидаги сулҳ 10 октябрдан кучга кирди. Биринчи босқичда ҲАМАС секторда қолган исроиллик асирларни озод қилиши, Исроил эса фаластинлик маҳбусларни озод этиши ва минтақадаги қўшинларини келишилган чизиқларга олиб чиқиши керак.