Olimlar 3D-printerda chop etilgan yuzni ilk marotaba odamga ko‘chirib o‘tkazdi

Britaniyada baxtsiz hodisadan so‘ng yuzining yarmini yo‘qotgan erkakning yuzi 3D-printerda chop etildi, deb xabar berdi Mirror.

2021 yilda Devonning 75 yoshli fuqarosi Deyv Richards dahshatli avtohalokatdan zo‘rg‘a omon qoldi. Uni velosiped haydab ketayotganida mast haydovchi urib yubordi. Erkak ko‘plab jarohatlar oldi - sinish, lat yeyish va yuz yarmining uchinchi darajali kuyishi. Bunday kuyishda terining barcha qatlamlari shikastlanadi, bitib ketganda chandiqlanadi, dag‘al va harakatsiz bo‘lib qoladi.

Jarrohlar erkakning ko‘zini saqlab qolishga harakat qildi, biroq infeksiya ko‘rish nervi orqali tarqalishi xavfi tufayli uni olib tashlashga to‘g‘ri keldi. Keyin shifokorlar tananing boshqa qismidan qon tomirlari bo‘lgan to‘qimani ko‘chirib o‘tkazdi, bu esa yuzning yarmini yopish uchun ishlatildi.

«Menda chandiqlarni olib tashlash uchun bir nechta operatsiyalar o‘tkazildi, - deb eslaydi Deyv. - Tiklanish qiyin kechdi, lekin men avvalgi qiyofam va ishonchimni qaytarish uchun qo‘limdan kelganini qilmoqchi edim».

Reabilitatsiya paytida Richards yangi 3D tibbiyot markazida ishlaydigan Reconstructive Prosthetics jamoasi bilan uchrashdi. Bu yerda unga o‘ziga xos protsedura - bosh shakli, teri, ko‘z va soch rangiga to‘liq mos keladigan individual yuz protezini yaratish taklif qilindi.

«Jarayon unchalik yoqimli bo‘lmadi - ko‘plab mum qoliplar, fotosuratlar, o‘lchovlar olish kerak edi. Ammo 3D texnologiyalari aql bovar qilmaydigan imkoniyatlarni ochib berdi. Endi protez maksimal darajada tabiiy ko‘rinadi va seziladi», dedi erkak.

NBT rekonstruktiv jarrohligi bo‘yicha katta mutaxassisi Emi Deyvining so‘zlariga ko‘ra, 3D-skanerlash protezlarni bemorning harakatlariga moslashtirish imkonini beradi va bosib chiqarishda ishlatiladigan materiallar teri uchun xavfsiz bo‘lib, to‘qimalar tuzilishini taqlid qilishi mumkin.

Protezni o‘rnatgandan so‘ng, Deyv tiklanish kursini davom ettirdi. Shuningdek, unga individual orbital protez va 3D-printerda chop etilgan bo‘yin korseti tayyorlandi.

Hozir erkak chandiqlardagi zo‘riqishni kamaytirish uchun davolanishni davom ettirmoqda.

«Avvaliga men bu texnologiyaga shubha bilan qaradim, - deb tan oldi erkak, - ammo endi shifokorlar va muhandislardan minnatdorman. Bu hayotimni o‘zgartirdi va o‘zimni yana o‘zimdek his qilishimga yordam berdi».