Finlyandiya ta’lim tizimida katta erkinlik mavjud – prezident Stubb

Finlyandiya prezidenti Aleksandr Stubb O‘zbekistonga tashrifi davomida o‘z mamlakati ta’lim tizimi haqidagi fikrlarini aytdi.

«Finlyandiya ta’lim modelidan qanday xulosa chiqarish mumkin. Bunda bir necha asosiy jihatlar bor. 

Birinchidan, kichik yoshdan boshlab ta’lim tizimi barcha uchun teng bo‘lishi kerak, shunda hamma bir xil darajada shakllanadi, albatta agar biror o‘quvchi tezroq rivojlanishni istasa, unga imkoniyat beriladi.

Ikkinchidan, barcha o‘qituvchilar pedagogika bo‘yicha magistr darajasiga ega. Bu yuqori malakali mutaxassislik bo‘lib, faqat talabgorlarning 10 foizi bunday maqomni qo‘lga kiritadi.

Uchinchidan, ta’limda katta erkinlik mavjud, ya’ni ma’lum bir o‘quv dasturini majburan o‘qitish shart emas.

To‘rtinchidan, biz o‘qituvchilarimizni juda qadrlaymiz. Menimcha, Arastu yoshlarga ta’lim berishdan ham olijanob ish yo‘q deb to‘g‘ri aytgan. Bular Finlyandiya o‘quv tizimi haqidagi asosiy xulosalar», dedi Stubb.