Strategik hujjatlar qonun va prezident hujjatlari bilan tasdiqlanadi

Prezidentning PF–201-son farmoniga muvofiq, 2025 yil 1 noyabrdan strategik rejalashtirish va rivojlanish tizimi joriy etiladi. Unga ko‘ra strategik ahamiyatga ega hujjatlar iyerarxiyasi belgilab olindi va tasdiqlash tartibi aniqlashtirildi.

Foto: Pexels

Farmon bilan strategik hujjatlar uch darajada shakllantiriladi va turli darajadagi hujjatlar bilan tasdiqlanadi:

1-daraja — konsepsiyalar: 7 yildan ortiq muddatga ishlab chiqiladi, qonunlar bilan tasdiqlanadi.
2-daraja — strategiyalar: 4–7 yil muddatga ishlab chiqiladi, prezident hujjatlari bilan tasdiqlanadi.
3-daraja — dasturlar (yo‘l xaritalari, chora-tadbirlar rejalari): 1–3 yil muddatga ishlab chiqiladi, Prezident hujjatlari hamda Vazirlar Mahkamasi qarorlari asosida tasdiqlanadi.

Yangi tizim strategik rejalashtirishning barcha bosqichlarini — ishlab chiqish, amalga oshirish, monitoring va baholashni qamrab oladi. Maqsad — milliy islohotlarni bir zanjirda uyg‘unlashtirish, indikator va natijalarga tayanadigan boshqaruvni kuchaytirish hamda ijro intizomini oshirish.

Sohalar va hududlar kesimida konsepsiya, strategiya va dasturlar bosqichma-bosqich ishlab chiqilishi, shuningdek hisobdorlik va monitoring tartiblari belgilanishi kutilmoqda.