Putin 2025 yilda Federal majlisga murojaat qilmaydi – OAV

Hukumatdagi uchta manbaga ko‘ra, Kreml hozir murojaatga tayyorgarlik ko‘rmayapti.

Foto: Vedomosti

Rossiya prezidenti Vladimir Putin 2025 yilda Federal majlisga yillik murojaat bilan chiqmaydi, deb xabar berdi Faridaily nashri.

Hukumatdagi uchta manbaga ko‘ra, hozir murojaatga tayyorgarlik ko‘rilmayapti. Dekabr oyida Putinning an’anaviy yillik matbuot anjumani «bevosita liniya» bilan birgalikda o‘tkazilishi e’lon qilindi va Kreml yana bir yirik tadbir o‘tkazishga qaror qilishi dargumon, deb ta’kidladi Faridaily suhbatdoshlari.

Federal majlisga murojaat qilish Rossiya prezidentining konstitutsiyaviy majburiyati bo‘lib, bu 84-moddada belgilangan.

2025 yilgi Murojaatnoma dastlab fevral oyida e’lon qilinishi rejalashtirilgan edi. Faridaily manbalarining xabar berishicha, u kechiktirildi, chunki Putin Oq uyga qaytgan Donald Tramp bilan tez orada uchrashishga umid qilgan va uning butun e’tibori uchrashuvga tayyorgarlik ko‘rishga qaratilgan (natijada prezidentlar faqat avgust oyida uchrashdi).

2022 yilda Rossiya Ukrainaga keng ko‘lamli bosqinni boshlaganida ham Putin murojaat bilan chiqmadi. Kreml buni urush sharoitida «dinamik» va tez o‘zgaruvchan vaziyat bilan izohladi.

Tayyorlagan: Сардор Юсупов

#Rossiya #Vladimir Putin #Murojaatnoma