Ko‘ksaroydagi yig‘ilishda O‘zbekiston–Qozog‘iston savdosini 10 mlrd dollarga yetkazish rejasi muhokama qilindi

Davlat rahbari 2024 yilda ta’sis etilgan Oliy davlatlararo kengash formati o‘zining dolzarbligi va samaradorligini namoyon etayotganini ta’kidladi.

– Munosabatlarimiz bugungi kunda eng yuqori – strategik sheriklik va ittifoqchilik darajasiga ko‘tarildi, – dedi Shavkat Mirziyoyev.

Yig‘ilishda hamkorlikning yangi yo‘nalishlari, ikki tomonlama salohiyatdan to‘liq foydalanish yo‘llari atroflicha ko‘rib chiqildi. O‘zaro savdoning barqaror o‘sishini ta’minlash, uning tarkibini diversifikatsiya qilish va biznes uchun yanada qulay sharoitlar yaratishga alohida e’tibor qaratildi. Yil boshidan buyon tovar ayirboshlash hajmi 4 milliard dollarga yetgani qayd etildi va 2030 yilgacha bu ko‘rsatkichni 10 milliard dollarga yetkazish rejasi tasdiqlandi.

Bu maqsadlarga erishish uchun savdo va investitsiya bitimlarining salmoqli to‘plami shakllantirilgani, “O‘zKazTreyd” kompaniyasi faoliyati yo‘lga qo‘yilgani, ishbilarmon doiralar o‘rtasida to‘g‘ridan-to‘g‘ri hamkorlik mexanizmlari ishlayotgani ta’kidlandi.

Yig‘ilishda shuningdek, sanoat kooperatsiyasi doirasida “Markaziy Osiyo” xalqaro sanoat kooperatsiyasi markazini ishga tushirish, umumiy qiymati 1,3 milliard dollarlik loyihalarni amalga oshirish, qiymati 8 milliard dollardan ortiq bo‘lgan yangi dasturni tayyorlash masalalari ko‘rib chiqildi.

Transport va logistika, suv-ekologiya, energiyani tejash, “yashil” texnologiyalar, axborot texnologiyalari, shuningdek, fan, ta’lim, madaniyat va turizm sohalaridagi qo‘shma tashabbuslar ham muhokama qilindi.

Yig‘ilish yakunida O‘zbekiston–Qozog‘iston hamkorligini yanada kengaytirishga xizmat qiluvchi qator muhim qarorlar qabul qilindi.