Xitoyda besh million kishini elektr bilan ta’minlovchi yirik AES qurilishi boshlandi

Qurilish tugaganidan so‘ng, «Chjaoyuan» atom elektr stansiyasi taxminan besh million aholining maishiy ehtiyojlarini qondirishga yetarli miqdorda elektr energiyasi ishlab chiqaradi.

Loyiha atrof-muhitni muhofaza qilishga muhim hissa qo‘shishi kutilmoqda: stansiya to‘liq quvvat bilan ishlaganidan keyin har yili an’anaviy ko‘mir sarfini 15,27 million tonnaga kamaytirish, uglerod gazi tashlamalarini esa 46,2 million tonnaga qisqartirish mumkinligi ta’kidlanmoqda. Loyiha muhandislarining aytishicha, bu samara 110 000 gektardan ortiq o‘rmon ekishga teng ta’sir ko‘rsatadi. Yakuniy rejaga ko‘ra, maydonda jami quvvati taxminan 7,2 million kilovatt bo‘lgan oltita «Xualun-1» reaktori o‘rnatilishi rejalashtirilgan.

Yangi AESning o‘ziga xos jihati — yangicha sovitish tizimi bo‘ladi. Birinchi energoblokni barpo etish beton quyish ishlari bilan boshlandi va tabiiy harakatli 203 metrli minorasimon gradirnya qo‘yildi — bunday turdagi sovitish minorasi «Xualun-1» reaktori uchun ilk bor qo‘llanmoqda. Maydoni 16 800 kvadrat metr bo‘lgan ushbu ulkan zona stansiyaning asosiy sovitish jarayonini dengiz suvidan atmosfera havosiga o‘tkazish imkonini beradi.