Shavkat Mirziyoyev va Sadir Japarov strategik hamkorlik va yirik qo‘shma loyihalarni muhokama qildi

Muloqot avvalida Shavkat Mirziyoyev Sadir Japarovni tavallud kuni bilan samimiy tabriklab, unga mustahkam sog‘lik va omad tiladi. Qardosh Qirg‘iziston xalqiga esa tinchlik, farovonlik va barqaror ravnaq tilab o‘tdi.

Suhbat davomida keyingi yillarda O‘zbekiston va Qirg‘iziston o‘rtasida erishilgan yutuqlar katta mamnuniyat bilan qayd etildi. Ta’kidlanishicha, barcha darajadagi aloqalar izchil davom etmoqda, tovar ayirboshlash va yuk tashish hajmi barqaror o‘sib bormoqda, iqtisodiyotning ustuvor tarmoqlarida qo‘shma loyihalar amalga oshirilmoqda. Shu bilan birga, faol madaniy-gumanitar va hududlararo almashinuvlar ikki xalqni yanada yaqinlashtirib bormoqda.

Yetakchilar alohida tarzda “O‘zbekiston – Qirg‘iziston – Xitoy” temir yo‘li hamda Qambarota GES-1 qurilishi kabi mintaqaviy ahamiyatga molik strategik loyihalar doirasida amalga oshirilayotgan ishlar borasida fikr almashdilar. Ushbu loyihalar Markaziy Osiyoda transport-tranzit salohiyatini oshirish va energetika sohasidagi hamkorlikni chuqurlashtirishga xizmat qilishi ta’kidlandi.

Tomonlar shuningdek mintaqaviy ahamiyatga molik dolzarb masalalar yuzasidan ham fikr almashib, qo‘shma sa’y-harakatlarni izchil davom ettirishga tayyor ekanini tasdiqladi.