Qirg‘iziston MXDQ sobiq rahbari Tashiyevning ishi maxfiylashtirilib, sudga yuborildi

Qirg‘iziston Bosh prokuraturasi Qamchibek Tashiyevga nisbatan qo‘zg‘atilgan jinoyat ishi bo‘yicha ayblov dalolatnomasini tasdiqladi. Kaktus.media xabariga ko‘ra, bu haqda advokat Ikromidin Aytqulov ijtimoiy tarmoqlardagi sahifasida ma’lum qildi.

Himoyachining so‘zlariga ko‘ra, Tashiyev hokimiyatni zo‘ravonlik bilan egallashga tayyorgarlik ko‘rish va mansab mavqeini suiiste’mol qilishda ayblanmoqda. Ish mazmunan ko‘rib chiqish uchun Bishkekning Pervomayskiy tuman sudiga yuborilgan. Ish bo‘yicha jami sakkiz nafar ayblanuvchi, jumladan, Tashiyevning o‘zi ham bor.

Advokatning ta’kidlashicha, ish materiallari maxfiylashtirilgan, sud majlislari yopiq tarzda o‘tkaziladi, tergov va sud ma’lumotlarini oshkor etish taqiqlanadi.

Avvalroq, Tashiyev ishning boshqa ishtirokchilari, sobiq bosh prokuror Qurmanqul Zulushev va parlamentning sobiq spikeri Nurlanbek Turg‘unbek o‘g‘li bilan birga IIV Tergov bosh boshqarmasiga bir necha soat davom etgan so‘roq uchun chaqirilgani xabar qilingandi.

So‘roqdan so‘ng Milliy xavfsizlik davlat qo‘mitasining sobiq rahbari o‘zining aybsizligini e’lon qilib, «qonun oldida pok» ekanini va o‘zini huquqiy maydonda himoya qilish niyatida ekanini aytdi.

Keyinchalik Tashiyev va boshqalarning qayta so‘roq qilingani, shuningdek, sobiq MXDQ rahbariga hokimiyatni zo‘ravonlik bilan egallash yoki ushlab turish va mansab vakolatini suiiste’mol qilish moddalari bo‘yicha ayblovlar qo‘yilgani ma’lum bo‘ldi.

Rasmiy organlar Qamchibek Tashiyev ishi bo‘yicha ma’lumotlarni oshkor qilmayapti.

Huquq-tartibot idoralaridagi manbalarga ko‘ra, tergov «75 odam xati» bilan bog‘liq. Fevral oyida 75 kishi prezident Sadir Japarov va Jogorku Kenesh raisi nomiga muddatidan oldin prezidentlik saylovini o‘tkazishga chaqiruvchi murojaat yo‘llagani ma’lum bo‘ldi. Shundan so‘ng, Qamchibek Tashiyev MXDQ rahbari va Vazirlar Mahkamasi rahbari o‘rinbosari lavozimlaridan ozod etildi; Milliy xavfsizlik davlat qo‘mitasi qayta tashkil etildi; bir qator yuqori martabali amaldorlar lavozimidan mahrum etildi; Nurlanbek Turg‘unbek o‘g‘li parlament spikeri vakolatlarini zimmasidan soqit qildi va deputatlik mandatini topshirdi; Qurmanqul Zulushev ham deputatlik mandatini topshirdi.