440 million kishi oflayn: internetga kirish muammosi qaysi davlatlarda kuchli?

Yuqorida taqdim etilgan yangi infografika internetga kirish imkoniga ega bo‘lmagan aholisi eng katta bo‘lgan mamlakatlarni reyting tartibida ko‘rsatadi va raqamli tafovut qayerda eng yaqqol ekanini ochib beradi. Ayniqsa, tez o‘sib borayotgan iqtisodiyotlarda bu tafovut katta: aloqa tarmoqlari rivoji aholi soni o‘sishiga ulgurmay qolmoqda.

Ma’lumotlar We Are Socialning Digital 2026 Global Overview Report hisobotidan olingan. Unda internetga ulanmagan odamlar soni keltiriladi va bu ko‘rsatkich har bir mamlakatning umumiy aholisi soniga nisbatan taqqoslanadi.

Hindiston internetga kirish imkoniyatiga ega bo‘lmagan odamlar soni bo‘yicha dunyoda birinchi o‘rinda: 440 milliondan ortiq kishi hali ham oflayn.

So‘nggi yillarda mobil keng polosali internetning o‘sishi vaziyatni yaxshiladi, ammo mamlakat aholisi juda katta bo‘lgani uchun hatto 30 foiz oflayn ulush ham ulanmaganlar sonining nihoyatda katta bo‘lib qolishiga olib keladi. Hindistonning o‘zida oflayn aholi soni AQSh va Kanada aholisini birga qo‘shgandan ham ko‘p.

Efiopiya, Tanzaniya va Uganda kabi mamlakatlarda internetsiz aholi ulushi 70 foizdan 80 foizgacha yetadi. Bu yuqori ko‘rsatkichlar keng polosali aloqa infratuzilmasining cheklangani, qurilmalarning kam tarqalgani va mobil internet trafigi narxining daromadlarga nisbatan qimmatligi bilan izohlanadi.

Hatto mintaqaning yirik iqtisodiyotlari hisoblangan Nigeriya va Kongo Demokratik Respublikasida ham aholining yarmidan ko‘pi oflayn qolmoqda.

Xitoy va Indoneziyada internetga ulanmaganlar soni mutlaq raqamlarda katta bo‘lsa-da, ulushi ancha past. Xitoyda bu ko‘rsatkich atigi 8,4 foiz, bu esa rivojlangan internet infratuzilmasi va smartfonlarning keng tarqalganini aks ettiradi. Indoneziyada ulanish sur’ati tez o‘smoqda, ammo mamlakat minglab orollardan iborat geografik tarqoqligi sabab 55 million kishi hali ham internetsiz qolmoqda.

Shu bilan birga, Pokiston va Bangladesh o‘rtacha ulanish darajasini ko‘rsatmoqda: mobil tarmoqlar kengayayotganiga qaramay, internetga ulanmagan aholi ulushi 50 foizdan yuqori.