O‘zbekistonga o‘qish uchun kelayotganlar ko‘paydi: yetakchi mamlakat - Hindiston

Milliy statistika qo‘mitasi ma’lumotlariga ko‘ra, 2025 yilning yanvar–noyabr oylarida jami 37,2 ming nafar chet el fuqarolari o‘qish maqsadida O‘zbekistonga tashrif buyurgan. Qayd etilishicha, mazkur ko‘rsatkich o‘tgan yilning mos davri bilan solishtirilganda 54,3 foizga ko‘paygan.

Ma’lumotlarga ko‘ra, joriy yilning 11 oyida O‘zbekistonga o‘qish maqsadida kelgan chet el fuqarolari soni mamlakatlar bo‘yicha quyidagicha taqsimlangan: Hindiston — 16,3 ming nafar, Turkmaniston — 8,9 ming nafar, Tojikiston — 2,7 ming nafar, Pokiston — 1,7 ming nafar, Xitoy — 1,4 ming nafar.

Shuningdek, Janubiy Koreyadan 870 nafar, Qirg‘iz Respublikasidan 823 nafar, Misrdan 737 nafar, Filippindan 501 nafar, AQShdan 464 nafar fuqaro o‘qish maqsadida O‘zbekistonga kelgan.

Ro‘yxatdan Turkiya — 357 nafar, Afg‘oniston — 291 nafar, Iordaniya — 194 nafar, Buyuk Britaniya — 179 nafar, Rossiya — 164 nafar, JAR — 155 nafar, Eron — 115 nafar, Qozog‘iston — 113 nafar, Bangladesh — 97 nafar, Italiya — 94 nafar fuqaro ham o‘rin olgan.