Mers: YeIning hech bir davlati hozir Ukrainaga askar yuborishni rejalashtirmayapti

Germaniya hukumati rahbari yevropalik kuchlarning davom etayotgan urushga kirishi haqida gap borayotgani yo‘qligini alohida ta’kidladi. “Biz o‘t ochish to‘xtatilgandan keyingi xavfsizlik kafolatlari haqida gapiryapmiz”, — deya tushuntirdi Fridrix Mers. U qo‘shimcha qilishicha, Yevropa Ittifoqidagi hech bir davlat hozirning o‘zida Ukrainaga askar yuborishni rejalashtirayotganini aytmayapti.

“Bu urushga barham berish uchun imkon boricha hamma narsa qilinmoqda, — dedi Mers. — Ammo bu holatda gap faqat tinchlikni harbiy jihatdan ta’minlash, o‘t ochishni to‘xtatish to‘g‘risidagi kelishuv haqida ketyapti”. Kansler Germaniya o‘z xavfsizlik kafolatlarini, jumladan Bundesver ishtirokini ta’minlash orqali ham, kiritishga tayyor ekanini bildirdi.

Mersning so‘zlariga ko‘ra, Ukrainaga xavfsizlik kafolatlari doirasida Bundesverni qanday aniq shaklda jalb etish masalasi faqat uning shaxsiy qaroriga bog‘liq emas. Buning uchun hukumat qarori ham, Bundestag mandati ham zarur. “Men koalitsiya ichida, zarurat tug‘ilsa, qaysi yo‘lni tanlashga tayyorligimiz borasida o‘zaro tushunishga kelishimizni istayman”, — dedi u.

Shu kunning o‘zida RF Tashqi ishlar vazirligi “ko‘ngillilar koalitsiyasi” tomonidan Ukrainaga xavfsizlik kafolatlari bo‘yicha deklaratsiya qabul qilinganini, shuningdek Ukraina, Fransiya va Buyuk Britaniyaning Ukrainada fransuz va britan qo‘shinlarini joylashtirish ehtimoli haqidagi kelishuvini keskin qoralagan edi. Moskva bunday bo‘linmalarni va Ukrainadagi g‘arb harbiy obektlarini “xorijiy intervensiya” hamda RF armiyasi uchun “qonuniy harbiy nishonlar” sifatida ko‘radi, deb ma’lum qildi Rossiya idorasi.

Parijda “ko‘ngillilar koalitsiyasi” uchrashuvida Mers Ukrainada o‘t ochish to‘xtatilgan taqdirda Germaniya prinsipial jihatdan nemis harbiylarini xalqaro tinchlikparvar kuchlar tarkibiga kiritishga tayyor ekanini aytgan. Biroq u ta’kidlashicha, dastlab ular Ukrainaga qo‘shni bo‘lgan NATO davlat hududida joylashtiriladi. Shu bilan birga, u nemis bo‘linmalarini bevosita Ukraina hududida ham joylashtirish ehtimolini istisno qilmagan.