AQSh Kongressiga Grenlandiyani qo‘shib olish to‘g‘risidagi qonun loyihasi kiritildi

Respublikachilar partiyasidan AQSh Vakillar palatasi a’zosi Rendi Fayn kongressda Grenlandiyani anneksiya qilish va orolga Amerika shtati maqomini berishni nazarda tutuvchi qonun loyihasini ilgari surdi. Bu haqda kongressmenning rasmiy saytidagi press-relizda aytiladi.

Hujjatga tushuntirish xatida ta’kidlanishicha, Qo‘shma Shtatlar o‘z strategik manfaatlarini himoya qilish uchun choralar ko‘rishi kerak. Tashabbus muallifining fikricha, Grenlandiya ustidan to‘liq nazorat o‘rnatish, ayniqsa, Arktikada ta’sir uchun kurash kuchaygan bir paytda, AQShning milliy xavfsizligi masalasidir.

«Grenlandiya Qo‘shma Shtatlar xavfsizligi uchun muhim ahamiyatga ega. Biz Arktika mintaqasida o‘sib borayotgan tahdidlarni e’tiborsiz qoldira olmaymiz va uning rivojlanishi Amerika manfaatlariga mos kelishini ta’minlash uchun qat’iy harakat qilishimiz kerak», deyiladi xabarda.

Qonun loyihasi, shuningdek, AQSh prezidenti Donald Trampga orol ustidan nazorat o‘rnatish uchun «har qanday zarur choralarni» ko‘rish vakolatini berishni taklif qilmoqda.

Tahlilchilarning fikricha, vaziyatning keskinlashuvi 2026 yil 3 yanvarda AQSh Venesuelada o‘tkazgan maxsus operatsiyasi bilan bog‘liq bo‘lib, bu Tramp ma’muriyatining yanada qat’iy tashqi siyosat olib borishga bo‘lgan ishonchini oshirgan.

9 yanvar kuni Tramp neft-gaz sanoati rahbarlari bilan uchrashuvda Amerika Grenlandiyani «yaxshi yoki yomon» usulda baribir olishini aytdi. O‘z navbatida, Oq uy matbuot kotibi Kerolayn Levitt ma’muriyat «AQSh manfaatlarini himoya qilish» uchun «barcha variantlarni, jumladan, harbiy kuch ishlatish imkoniyatini ko‘rib chiqayotganini» tasdiqladi.

Grenlandiya - Daniya Qirolligi tarkibidagi avtonom hudud, keng ichki mustaqillikka ega, ammo mutlaq mustaqillik haqida tobora ko‘proq gapirmoqda.

Daniya Grenlandiya ustidan suverenitetni saqlab qolmoqda va tashqi siyosat va mudofaa uchun javobgardir. Shuningdek, Grenlandiya hech qachon AQShga berilmasligini ta’kidlab kelmoqda.