Xiaomi ultratovush dinamikli smart-ko‘zoynak chiqardi

Ko‘zoynak gardishiga o‘rnatilgan sensor panel yordamida boshqariladi. Unda to‘xtovsiz 13 soat musiqa eshitish mumkin, u 10 daqiqa quvvatlanganida to‘rt soatgacha ishlaydi.

Foto: Mijia Smart Audio Glasses

Xiaomi kompaniyasi Yevropa bozoriga Mijia Smart Audio Glasses smart-ko‘zoynagini chiqardi.

Ko‘zoynak gardishiga ultratovush dinamik va to‘rtta mikrofon o‘rnatilgan. Tovushni havo orqali uzatish texnologiyasi atrof-muhitni ham eshitish imkonini beradi. Qurilma tovushning tashqariga eshitilishidan ikki karra himoyalangan bo‘lib, atrofdagilar undan chiqayotgan ovozni eshitmaydi.

U gardishiga o‘rnatilgan sensor panel yordamida boshqariladi, kengaytirilgan sozlamalarga esa Xiaomi Glasses ilovasi orqali kirish mumkin. Ushbu ilova imo-ishora, ovozli yordamchini qo‘llab-quvvatlaydi, ko‘zoynak yo‘qolganida topishga yordam beradi.

Qurilmada to‘xtovsiz 13 soat musiqa eshitish mumkin, u 10 daqiqa quvvatlanganida to‘rt soatgacha ishlaydi. Ko‘zoynak Bluetooth 5.2ni qo‘llab-quvvatlaydi, bir vaqtning o‘zida ikkita qurilmaga ulash mumkin hamda chang va suvdan IP54 standarti bo‘yicha himoyalangan.

Uning Titanium modeli 199, Browline va Pilot modellari esa 179 yevrodan taklif etilmoqda.