Rossiyada migrantlar soni 10 foizga kamaydi, buning sabablari aytildi

Rossiyada migrantlar soni bir yil ichida 10 foizga kamaydi. 2026 yil boshida mamlakatda 5,7 million xorijlik bo‘lsa, o‘tgan yil boshida ularning soni 6,3 millionga yaqin edi. Bunday ma’lumotlarni IIV migratsiya xizmati tahliliy boshqarmasi boshlig‘i Aleksandr Perejogin Prezident akademiyasi Davlat boshqaruvi oliy maktabida (RANXiGS) tashkil etilgan «Rossiyaning yangi migratsiya siyosati» konferensiyasida keltirdi.

Rossiyada migrantlar soni kamayishining asosiy sabablari orasida migratsiya qonunchiligi va chet ellik bolalarni ta’lim muassasalariga qabul qilish talablarining kuchaytirilishi bor.

Agar ilgari qonunlarni buzgan chet elliklar politsiya e’tiboriga tushmaguncha Rossiyada qolishi mumkin bo‘lsa, hozir ular darhol nazorat ostidagi shaxslar reyestriga (RKL) tushib qoladi, bu esa avtomatik ravishda keyingi qonuniylashtirish va moliyaviy xizmatlardan foydalanishga to‘sqinlik qiladi. Shu bilan birga, rasmiylar yanada oldinga siljishni rejalashtirmoqda va migrantlarni uyushgan tarzda jalb qilish imkoniyatini ko‘rib chiqmoqda. Bunda migrant muayyan ish beruvchi bilan shartnoma tuzadi, maxsus tizimda ro‘yxatdan o‘tadi va qoidalarni buzgan taqdirda Rossiyada qolish imkoniyatidan mahrum bo‘ladi.

Shuningdek, o‘tgan yildan beri Rossiyada chet elliklarni «nikoh orqali» qonuniylashtirish jarayoni kuchaytirildi. Endi ular Rossiya fuqarosi bilan ikki yil birga yashagandan keyingina mamlakatda vaqtincha yashash uchun ruxsatnoma (VNJ) olishi mumkin.

Bu borada migrantlarning farzandlarini ta’lim muassasalariga qabul qilish bilan bog‘liq vaziyat ham muhim ahamiyatga ega. 2025 yilda Rossiyada rus tilini bilish bo‘yicha testdan o‘tmagan voyaga yetmagan xorijliklarni maktab va kollejlarga qabul qilish taqiqlandi. Shu bilan birga, o‘z farzandlarini majburiy umumiy maktab ta’limi bilan ta’minlamagan ota-onalar mamlakatda qolish ruxsatnomasidan mahrum etilishi mumkin. Kiritilgan ko‘plab taqiqlar oqibati - raqamlarda. Ichki ishlar vazirligi ma’lumotlariga ko‘ra, 2026 yilda Rossiyada migrant bolalarning soni o‘tgan yilgi ko‘rsatkichlarga nisbatan 25 foizga kamaygan.

Shu bilan birga, hududlarda qurilish, taksi, yetkazib berish, umumiy ovqatlanish kabi sohalarda ishchi kuchi tanqisligiga duch kelib, migrantlar sonining kamayishi salbiy oqibatlarga olib kelayotganini allaqachon payqay boshlagan.

Rossiya Fanlar akademiyasi Sotsiologiya markazining Demografik tadqiqotlar instituti (FNIISS) xodimi Viktoriya Ledenevaning so‘zlariga ko‘ra, migrantlarning ketishi ko‘plab loyihalarni sekinlashtirgan, ammo shu bilan birga ish haqining oshishi kuzatilgan. «Shunga mos ravishda mahsulot tannarxi ham oshdi», dedi ekspert Krasnoyarsk o‘lkasi misolida. Sankt-Peterburgda, Ledenevaning so‘zlariga ko‘ra, cheklovlar joriy etilgandan so‘ng taksi, uy-joy kommunal xizmat ko‘rsatish, yetkazib berish kabi xizmatlar narxi oshgan. Bundan tashqari, bir tomondan, mintaqaviy cheklovlar joriy etilganda bo‘sh ish o‘rinlari ko‘payadi, boshqa tomondan, migrantlarning noqonuniy mehnati ko‘payadi.