Xorazm viloyati hokimiga yangi birinchi o‘rinbosar tayinlandi

Xorazm viloyati hokimligida kadrlar o‘zgarishi amalga oshirildi. Anvar Kenjayevich Davletov viloyat hokimining moliya–iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimiga tayinlandi.

Foto: O‘zA

A.Davletov tayinlovga qadar viloyat hokimining o‘rinbosari – investitsiyalar, sanoat va savdo boshqarmasi boshlig‘i sifatida faoliyat yuritib kelgan. Ushbu lavozimda hududga investitsiyalarni jalb qilish, sanoat korxonalari faoliyatini muvofiqlashtirish, tashqi savdo hajmini oshirish va yangi ish o‘rinlari yaratish yo‘nalishlarida ish olib borgan.

Yangi lavozimida Davletov moliyaviy barqarorlikni ta’minlash, mahalliy budjet daromadlarini ko‘paytirish, tadbirkorlikni qo‘llab-quvvatlash hamda aholi bandligini oshirishga qaratilgan dasturlar ijrosini muvofiqlashtiradi. Shuningdek, kambag‘allikni qisqartirish bo‘yicha hududiy “yo‘l xaritalari”ni amalga oshirish, manzilli ijtimoiy yordam mexanizmlarini takomillashtirish va iqtisodiy loyihalar samaradorligini oshirish uning asosiy vazifalaridan biri bo‘ladi.

Qayd etilishicha, mazkur tayinlov hudud iqtisodiyotini yanada rivojlantirish va aholi farovonligini oshirishga qaratilgan chora-tadbirlar izchilligini ta’minlash maqsadida amalga oshirildi.