Ishinger: Epshteyn ishida Rossiya izi bo‘lsa, hayron bo‘lmayman

Rossiya “barcha jihatlarda” butun Yevropa va ayrim Yevropa mamlakatlariga, xususan Germaniyaga qarshi gibrid urush olib bormoqda. Bu bayonotni MSC 2026 raisi vazifasini bajaruvchi Volfgang Ishinger dushanba, 9 fevral kuni DW’ga bergan intervyusida bildirgan. U bu fikrni amerikalik moliyachi Jyeffri Epshteyn ishida ehtimoliy “Rossiya izi” haqidagi savolga izoh berar ekan aytgan. Epshteyn voyaga yetmaganlarni zo‘rlash va fohishalikka majburlashda aybdor deb topilgan.

“Bizda qotilliklar bo‘lgan, kiberhujumlar bo‘lgan. Har xil targ‘ibot faoliyati bo‘lgan. Boshqacha aytganda, Rossiya g‘arbda qaror qabul qiluvchi siyosatchilar va jamoatchilikka ta’sir o‘tkazish uchun istalgan yo‘lni izlashi hayratlanarli emas. Epshteyn ishida Rossiya izi bormi? Bilmayman, lekin shunday deyman: agar bu iz borligi ma’lum bo‘lib qolsa, bu meni hayron qoldirmaydi”, — degan sobiq diplomat.

Rossiya tomonidan harbiy tahdiddan xavotirlanayotgan NATO davlatlarining xavfsizligini ta’minlashga Germaniya qanday hissa qo‘sha olishi mumkinligi haqida gapirar ekan, Ishinger Germaniya Ikkinchi jahon urushidan beri ilk bor qo‘shni davlat — Litva hududida bundesverning butun bir brigadasini joylashtirganini eslatgan.

"Bu katta mablag‘ talab qiladi. Va mening bilishimcha, litvaliklar o‘zlarining harbiy ‘umurtqa pog‘onasi’ kuchayganidan juda mamnun. Litvadek kichik mamlakat uchun butun bir brigada — bu arzimas narsa emas, — deb ta’kidlagan u. — NATOni oldingi front chizig‘ida turgan davlatlarni qanday mustahkamlashi mumkinligi haqida o‘ylab ko‘rishga chaqiraman. Litva — shulardan biri. Ammo Polsha ham bor, Estoniya bor, Latviya bor, boshqalar ham bor, Finlandiya ham bor".

Biz oldingi chiziqda turgan davlatlarni xuddi shu tarzda kuchaytirishga hissa qo‘sha olamizmi — ya’ni, sovuq urush davrida Germaniyani himoya qilishga yordam bergan amerikaliklar, britaniyaliklar, fransuzlar, belgiyaliklarning askarlari hamda ko‘p miqdorda tanklar va samolyotlar hozir bo‘lgani kabi? Aslida shunday bo‘lishi kerak”.

“Biz tushunishimiz kerak: vazifamiz faqat Germaniya chegaralarini himoya qilish emas, vazifamiz — Yevropa Ittifoqini yaxlit holda himoya qilish”, — deb qo‘shimcha qilgan u.

Transatlantik munosabatlar yomonlashgani haqidagi savolga javob berar ekan, Ishinger “ishonch, aftidan, chayqaldi”, deya qayd etgan. “Grenlandiyani eslang. Yaqindagi boshqa masalalarni ham eslang”, — degan u.

Shu munosabat bilan u Yevropa AQSh talabini qanday bajara olishi — ya’ni, o‘z mudofaasini ko‘proq o‘z qo‘liga olishi haqida o‘ylab ko‘rish zarurligini aytgan. “Biz bu talabga javob berishimiz va o‘zimizga biroz ko‘proq ishonadigan bo‘lishimiz kerak”, — deb hisoblaydi Ishinger. Shu bilan birga, u bunday jarayonga ko‘p oy, ehtimol yillar ham ketishi mumkinligini tan olgan.