Tramp «Tinchlik kengashi» yordamida BMT rolini kuchaytirish rejalarini e’lon qildi

AQSh ma’muriyati BMT bilan yaqindan hamkorlik qilish va uning salohiyatini «Tinchlik kengashi nazorati ostida» ochish niyatida, dedi prezident Donald Tramp tuzilmaning Vashingtondagi birinchi yig‘ilishida.

«Biz Birlashgan Millatlar Tashkiloti bilan juda yaqin hamkorlik qilmoqchimiz [...] Tinchlik kengashi Birlashgan Millatlar Tashkilotini deyarli kuzatib boradi va uning to‘g‘ri ishlashini nazorat qiladi», dedi Tramp.

Donald Tramp BMTni moliyaviy qo‘llab-quvvatlash va tashkilot infratuzilmasini modernizatsiya qilish rejalari haqida ma’lum qildi. Uning fikricha, tegishli ko‘mak va nazorat ostida BMT xalqaro siyosatning «yanada kuchli vositasiga aylanishi kerak».

19 fevral kuni Vashingtonda «Tinchlik kengashi»ning birinchi yig‘ilishi ochildi. Unda 20 dan ortiq davlat delegatsiyasi ishtirok etmoqda. Tuzilma G‘azo sektoridagi vaziyatni nazorat qilish uchun yaratilgan edi, keyinroq, Donald Tramp boshqa mintaqalardagi mojarolarni hal qilish uchun uning vakolatlarini kengaytirdi.