Baxtiyor Saidov Afg‘oniston va Pokiston tashqi ishlar vazirlari bilan muloqot o‘tkazdi

O‘zbekiston tashqi ishlar vaziri Baxtiyor Saidov Afg‘oniston tashqi ishlar vaziri Mavlaviy Amir Xon Muttaqiy bilan telefon orqali muloqot qildi.

Qayd etilishicha, suhbat davomida Afg‘oniston – Pokiston chegarasidagi mavjud vaziyat yuzasidan fikr almashdik hamda vazminlikni saqlash va vaziyatning yanada keskinlashuviga yo‘l qo‘ymaslik muhimligi ta’kidlandi.

“Barqarorlikni ta’minlash va mavjud xavf-xatarlarni bartaraf etishda muloqot asosiy vosita bo‘lib qolishi zarurligini tasdiqladik”, deb ma’lum qildi Saidov o‘z telegram-kanalida.

Saidov shuningdek, Pokiston tashqi ishlar vaziri Muhammad Ishoq Dar bilan telefon orqali o‘tkazgan muloqotida Pokiston va Afg‘oniston o‘rtasidagi so‘nggi vaziyat yuzasidan fikr almashdi.

“Mavjud qarama-qarshilikni yumshatish va barqarorlikni ta’minlash maqsadida o‘zaro ishonch hamda izchil muloqotning ahamiyati zarurligini alohida qayd etdik”, dedi O‘zbekiston tashqi ishlar vaziri.

26 fevral kuni Afg‘oniston va Pokiston bir-biriga zarbalar bergan, O‘zbekiston ularni o‘t ochishni darhol to‘xtatishga chaqirgandi.