BMT Erondagi urush tufayli dunyoda rekord darajadagi ocharchilik haqida ogohlantirdi

Eron atrofidagi mojaro dunyoda oziq-ovqat bilan bog‘liq vaziyatni keskin yomonlashtirishi va ochlar sonini rekord darajaga oshirishi mumkin, deb yozdi Bloomberg nashri BMT Jahon oziq-ovqat dasturiga (WFP) tayanib.

Ochlikka qarshi kurash bo‘yicha dunyodagi eng yirik gumanitar tashkilotning fikricha, agar yil o‘rtalariga qadar keskinlik to‘xtamasa, 45 milliongacha odam oziq-ovqat tanqisligiga duch kelishi mumkin. Oziq-ovqat ta’minoti barqaror bo‘lmaganidan aziyat chekayotganlarning umumiy soni 363 million.

BMT asosiy xavf omillaridan biri sifatida Ho‘rmuz bo‘g‘ozi orqali kema qatnovining buzilishi, shuningdek, Qizil dengizda yuk tashish uchun o‘sib borayotgan tahdidlarni ko‘rsatmoqda.

Eron bilan urush yoqilg‘i va o‘g‘it narxining oshishiga olib keladi, bu esa Yaqin Sharqdan tashqaridagi oziq-ovqat bozorlariga bosimni kuchaytiradi.

«Agar mojaro davom etsa, u butun dunyo bo‘ylab shok to‘lqinlarini keltirib chiqaradi va oziq-ovqat sotib olishga qurbi yetmaydigan oilalar eng ko‘p zarar ko‘radi», dedi WFP ijrochi direktori o‘rinbosari Karl Skau.

Fors ko‘rfazidagi logistika uzilishlari allaqachon eng zaif mamlakatlarda, jumladan, asosiy tovarlar narxi tez o‘sib borayotgan Sudan va Somalida o‘z aksini topmoqda. Eng ko‘p oziq-ovqat va yoqilg‘i importiga bog‘liq bo‘lgan Afrika mamlakatlari inqirozga duchor bo‘lgan. WFP prognozlariga ko‘ra, ushbu hududlarda oziq-ovqat tanqisligini boshdan kechirayotgan odamlar soni 20 foizga oshishi mumkin.