Pentagon Ukrainaga harbiy yordamni muvofiqlashtirgan generalga qarshi tergov yuzasidan hisobot berdi

AQSh mudofaa vazirligi 2024 yilda Ukrainaga harbiy yordamni muvofiqlashtirishga mas’ul bo‘lgan iste’fodagi general-mayor Antonio Agutoga nisbatan tergov bo‘yicha hisobotni e’lon qildi. Tergovga generalning hamkasblari tomonidan anonim tarzda aytib berilgan ikki voqea sabab bo‘lgan.

Bu voqealardan birinchisi 2024 yil aprelida ro‘y bergan. O‘shanda Aguto poyezdda Ukrainadan Germaniyaning Visbaden shahriga borgan va maxfiy xaritalar solingan idishni kupeda qoldirib ketgan. Hujjatlarni bir kun davomida qidirishgan, keyin esa uni ukrainalik bort kuzatuvchisi topib olib, Amerika elchixonasiga olib borgan.

Yakunda maxfiy xaritalar tarqalib ketmagan, ammo general bu voqea uchun javobgarlikni o‘z zimmasiga olgan.

Ikkinchi hodisa esa Agutoning 2024 yil mayida Kiyevga qilgan xizmat safari bilan bog‘liq, o‘shanda u mast bo‘lib qolib, miyasi chayqalgan. Pentagon bosh inspektori idorasi aniqlashicha, 13 may kuni general gruzin restoranidagi ziyofatga borgan. Marosim olti soat davom etgan. Bu vaqt mobaynida harbiy o‘z suhbatdoshi (hisobotda uning shaxsi yashirilgan) ikki shisha chachi ichimligini bo‘shatgan.

Aguto mehmonxonaga qaytganidan keyin nomerda yiqilgan va boshi bilan devorga urilgan. Tun davomida u yana yiqilib tushgan va peshonasi bilan yerga tushgan.

14 may kuni soat 9:00 da generalni mashinada AQShning Kiyevdagi elchixonasiga olib ketishgan. Hisobotda aytilishicha, u mashinadan chiqishda ham yiqilib, tirsagi va jag‘i bilan beton trotuarga urilgan, natijada kurtkasi va ko‘ylagi yirtilgan.

O‘n daqiqa o‘tib general o‘sha vaqtdagi davlat kotibi Entoni Blinken bilan uchrashuvda hozir bo‘lgan. Bir yarim soatdan keyin esa o‘z qo‘l ostidagilar bilan videokonferensiyada qatnashgan. Guvohlarning so‘zlariga ko‘ra, ikki tadbirda ham Agutoning mastligi ko‘rinib turardi.

Uch soatdan keyin general Ukraina harbiy rahbariyati bilan uchrashuvda qatnashadi. Ukraina qurolli kuchlari harbiylari ham uning o‘zini tutishidan mastligini gumon qilishadi.

Soat 15:00 lar atrofida Amerika elchixonasi shifokori Agutoga miya chayqalishi tashxisini qo‘yadi va uni mahalliy gospitalga yuboradi. U yerda tashxis tasdiqlanadi. Keyingi kuni Aguto Ukrainani tark etadi.

Yakunda Pentagon inspektori ofisi generalni harbiy xizmatchiga bir kun davomida ikki ryumkadan ortiq o‘tkir spirtli ichimlik ichishni taqiqlovchi nizomni buzganlikda aybdor deb topadi.

2024 yil avgustida Aguto Ukraina xavfsizligiga ko‘maklashish guruhi (SAG-U) rahbari lavozimini tark etadi.