Eron AQSh bilan muzokaralarning ikkinchi bosqichida qatnashishdan bosh tortdi

Eron Islomobodda o‘tkazilishi rejalashtirilgan AQSh bilan muzokaralarning ikkinchi bosqichida qatnashmaydi, deb xabar qildi IRNA agentligi.

"Eron AQSh bilan muzokaralarning ikkinchi bosqichida qatnashishdan bosh tortdi", — deyiladi agentlik xabarida.

Tehron ushbu qarorni Vashingtonning haddan ortiq talablari va voqelikdan uzoq kutilmalari hamda AQSh tomonidan Ho‘rmuz bo‘g‘ozi qamali davom etayotgani bilan izohladi.

Avvalroq AQSh prezidenti Donald Tramp Amerika delegatsiyasi Eron bilan muzokara o‘tkazish uchun Islomobodga yo‘l olganini aytgandi.

Oq uy rahbari o‘zaro kelishuv imzolanishiga umid bildirgan, lekin shu bilan birga, agar Eron kelishuvga rozi bo‘lmasa, mamlakatdagi barcha elektr stansiyalari va ko‘priklarni yo‘q qilish bilan tahdid qilgandi.

Muzokaralarning birinchi bosqichi o‘tgan haftada Islomobodda bo‘lib o‘tdi, ammo tomonlar ayrim masalalarda murosaga kela olishmadi.