Эрон АҚШ билан музокараларнинг иккинчи босқичида қатнашишдан бош тортди

Теҳрон ушбу қарорни Вашингтоннинг ҳаддан ортиқ талаблари ва воқеликдан узоқ кутилмалари ҳамда АҚШ томонидан Ҳўрмуз бўғози қамали давом этаётгани билан изоҳлади.

Фото: tasnimnews.ir

Эрон Исломободда ўтказилиши режалаштирилган АҚШ билан музокараларнинг иккинчи босқичида қатнашмайди, деб хабар қилди IRNA агентлиги.

"Эрон АҚШ билан музокараларнинг иккинчи босқичида қатнашишдан бош тортди", — дейилади агентлик хабарида.

Аввалроқ АҚШ президенти Доналд Трамп Америка делегацияси Эрон билан музокара ўтказиш учун Исломободга йўл олганини айтганди.

Оқ уй раҳбари ўзаро келишув имзоланишига умид билдирган, лекин шу билан бирга, агар Эрон келишувга рози бўлмаса, мамлакатдаги барча электр станциялари ва кўприкларни йўқ қилиш билан таҳдид қилганди.

Музокараларнинг биринчи босқичи ўтган ҳафтада Исломободда бўлиб ўтди, аммо томонлар айрим масалаларда муросага кела олишмади.