Shavkat Mirziyoyev Xitoy zavodidagi fojia munosabati bilan Si Jinpingga hamdardlik bildirdi

Prezident Shavkat Mirziyoyev Xitoyning Xunan provinsiyasidagi sanoat korxonasida yuz bergan fojia oqibatida ko‘plab insonlar qurbon bo‘lgani va jiddiy jarohat olgani munosabati bilan Xitoy raisi Si Jinpingga hamdardlik bildirdi.

Davlat rahbari vafot etganlarning oila a’zolari va yaqinlariga sabr-toqat va bardamlik so‘zlarini yo‘llab, jarohatlanganlar tez fursatda shifo topishini tiladi.

Xitoyning Xunan provinsiyasida mushaklar ishlab chiqaruvchi zavodda ro‘y bergan kuchli portlash oqibatida 30 ga yaqin odam halok bo‘ldi va 60 dan ortig‘i jarohatlangan edi.

Xitoy raisi Si Jinping fojiadan so‘ng rasmiylarga asosiy tarmoqlarda xavf-xatarlarni tekshirish va xavfni nazorat qilishni kuchaytirish, jamoat xavfsizligini boshqarishni yaxshilash, odamlar hayoti va mol-mulki xavfsizligini ta’minlash bo‘yicha topshiriq berdi. U shuningdek aybdorlarni javobgarlikka tortishga chaqirdi.