AQSh Raul Kastroga sirtdan jinoiy ayblov e’lon qildi

Raul Kastroga ayblov e’lon qilinishi Kuba va AQSh o‘rtasidagi «munosabatlarda yangi eng past nuqtani anglatishi» ta’kidlanmoqda.

Foto: REUTERS/Norlys Perez

AQSh Kubaning sobiq rahbari Raul Kastroga qarshi rasman jinoiy ayblovlar qo‘ydi. Bu haqda Reuters Donald Tramp ma’muriyatining nomi oshkor etilmagan yuqori martabali amaldoriga tayanib xabar bermoqda. Qaysi ayblovlar haqida gap ketayotganiga manba aniqlik kiritmadi.

Avvalroq bir nechta Amerika ommaviy axborot vositalari manbalarga tayanib, ayblovlar 1996 yilda Kuba harbiy-havo kuchlari Qshchshma Shtatlardagi kubalik diasporaga tegishli bo‘lgan va dengizda kubalik qochqinlarni qidirayotgan ikkita fuqaro samolyotini urib tushirgan voqea bilan bog‘liq bo‘lishi haqida yozgan edi. Shu vaqtda to‘rt kishi halok bo‘lgan.

Reuters nashrining yozishicha, Raul Kastroga ayblov e’lon qilinishi Kuba va AQSh o‘rtasidagi «munosabatlarda yangi eng past nuqtani anglatadi».

Raul Kastro — 1959 yilgi Kuba inqilobi rahbarlaridan biri. U o‘nlab yillar davomida Kubada yuqori lavozimlarda ishlagan, 2006 yildan esa akasi Fidel Kastroning kasalligi tufayli mamlakatning amaldagi (keyin esa rasmiy) rahbariga aylangan. Raul Kastro 2018 yilda iste’foga chiqdi.

Donald Tramp davrida AQSh Kuba hukumatiga bosimni sezilarli darajada kuchaytirdi va 2026 yil boshidan orolni yoqilg‘i blokadasiga oldi. Oq uy Kuba prezidenti Migel Dias-Kanelni hokimiyatdan chetlatishga harakat qilayotganini yashirmayapti.