Tobora ko‘proq amerikaliklar Trampning iqtisodiy siyosatidan norozi

Newsweek nashri e’lon qilgan American Research Group so‘roviga ko‘ra, Trampning reytingi uning ikki muddat prezidentlik davridagi eng past darajaga tushgan. So‘rov ishtirokchilarining 31 foizi Trampning ishini ma’qullaydi, 64 foizi esa ma’qullamaydi. Aprel oyida bu ko‘rsatkichlar mos ravishda 32 foiz va 63 foiz edi.

SSRS tomonidan CNN telekanali uchun may oyida o‘tkazilgan so‘rov natijalariga ko‘ra, respondentlarning 65 foizi Trampning faoliyatini ma’qullamasligini, faqat 35 foizi ma’qullashini ma’lum qilgan. Aprel oyiga nisbatan ma’qullamaslik darajasi bir foiz punktga oshdi.

Reuters/Ipsos kompaniyasining so‘nggi so‘rovi natijalari shuni ko‘rsatadiki, respondentlarning 35 foizi Trampning prezident sifatidagi faoliyatini ma’qullaydi, 63 foizi esa ma’qullamaydi. Reuters/Ipsos Trampni qo‘llab-quvvatlashning rekord darajadagi pastligini (34 foiz) qayd etgan aprel oyidagi ko‘rsatkichlar bilan solishtirganda, amerikaliklarning prezident faoliyatini ma’qullash darajasi oshdi. Biroq, Reuters ma’lumotlariga ko‘ra, 2025 yil yanvar oyida Tramp ikkinchi muddatini 42 foiz ma’qullash darajasi bilan boshlagan.

Shunga o‘xshash manzarani The Economist ham qayd etdi, uning hisob-kitoblariga ko‘ra, may oyida Trampning faoliyatini respondentlarning 37 foizi ma’qullagan, 57 foizi esa ma’qullamagan.

Sanab o‘tilgan barcha so‘rovnomalar ma’lumotlariga ko‘ra, amerikaliklarning Trampning iqtisodiy siyosatidan noroziligi eng ko‘p o‘sgan.

Respublikachilar partiyasiga ovoz beruvchi amerikaliklar orasida ham Trampni qo‘llab-quvvatlash darajasi pasaymoqda. Reuters/Ipsos ma’lumotlariga ko‘ra, may oyida ro‘yxatdan o‘tgan respublikachi saylovchilarning 79 foizi Trampning AQSh prezidenti sifatidagi faoliyatini ma’qullashini aytgan, aprel oyida bu ko‘rsatkich 82 foizni, ikkinchi muddatining boshida esa 91 foizni tashkil etgan.

Noyabr oyida AQShda oraliq saylovlar bo‘lib o‘tadi, uning natijalariga ko‘ra respublikachilar Kongressning ikkala palatasida ham ko‘pchilik o‘rinlarni egallay olish-olmasligi aniqlanadi. Respublikachilar partiyasi siyosiy maslahatchisi Janet Xoffmanning Reuters agentligiga aytishicha, Tramp reytingining pasayishi saylov natijasiga qanday ta’sir qilishi mumkinligini hozircha aytish qiyin. Shu bilan birga, u respublikachi saylovchilarning aksariyati hamon Trampni qo‘llab-quvvatlashini ta’kidladi. «80 foiz hali ham ancha katta raqam», dedi u.