Saida Mirziyoyeva AQSh Eksimbanki va DFC rahbarlari bilan muzokara o‘tkazdi

Saida Mirziyoyeva AQSh Eksport-import banki (Exim Bank) prezidenti Jon Yovanovich hamda AQSh Xalqaro moliyaviy taraqqiyot korporatsiyasi (DFC) bosh ijrochi direktori Ben Blek bilan muloqot o‘tkazganini ma’lum qildi.

Uchrashuv davomida sanoat, moliya va investitsiyalar sohasida amalga oshirilayotgan loyihalarning bugungi holati hamda ularni yanada kengaytirish istiqbollari ko‘rib chiqildi. Tomonlar O‘zbekiston iqtisodiyotining turli tarmoqlarida yangi investitsiya imkoniyatlarini yaratish va qo‘shma tashabbuslarni qo‘llab-quvvatlash masalalari yuzasidan fikr almashdi.

Muzokaralarda qo‘shma investitsiya platformasini rivojlantirish mavzusi alohida e’tibor markazida bo‘ldi. Qayd etilishicha, mazkur mexanizm ikki mamlakat biznes doiralari o‘rtasidagi hamkorlikni faollashtirish va yangi sarmoyaviy loyihalarni amalga oshirish uchun muhim vosita bo‘lishi mumkin.

Saida Mirziyoyeva Toshkent investitsiya forumi O‘zbekistonning xorijiy hamkorlari bilan mavjud va istiqbolli loyihalar bo‘yicha rejalarni muvofiqlashtirish, yangi tashabbuslarni muhokama qilish hamda uzoq muddatli sheriklik munosabatlarini mustahkamlash uchun samarali maydon vazifasini o‘tayotganini ta’kidladi.

Shuningdek, amerikalik hamkorlarning nafaqat mamlakatning iqtisodiy imkoniyatlari, balki uning boy tarixi, madaniyati va merosiga ham katta qiziqish bildirayotgani qayd etildi. Bu esa ikki davlat o‘rtasidagi munosabatlar iqtisodiy hamkorlik bilan cheklanib qolmay, madaniy va gumanitar aloqalar orqali ham mustahkamlanib borayotganini ko‘rsatadi.

Mutaxassislar fikricha, AQShning yetakchi moliya institutlari bilan muloqotlar O‘zbekistonga xorijiy investitsiyalarni jalb qilish, yuqori texnologiyali ishlab chiqarishlarni rivojlantirish va yirik infratuzilma loyihalarini moliyalashtirish imkoniyatlarini kengaytirishga xizmat qilishi mumkin.