9 fevral kuni chegarachilar Belarus-Litva chegarasidan 300 metr masofada erkak kishini qo‘lga oldi. U Voronovskiy tumani Kuji qishlog‘i yaqinida Belarus davlat chegarasini noqonuniy kesib o‘tgan.
Foto: pk.gov.by
Davlat chegara qo‘mitasi matbuot xizmati xabariga ko‘ra, harbiylar jinoyatni sodir etgan shaxs Germaniyada yashovchi 41 yoshli O‘zbekiston fuqarosi ekanligini aniqlagan.
Qo‘lga olingan shaxs chegarani noqonuniy kesib o‘tib, yaqinlari bilan uchrashish maqsadida O‘zbekistonga borishni rejalashtirgan.
Chegarachilar qo‘lga olingan erkakning shaxsini aniqlash jarayonida ushbu shaxs noqonuniy migratsiyani tashkil qilgani uchun xalqaro qidiruvda bo‘lganini aniqladi.
Chegarani buzgan shaxs chegarani noqonuniy kesib o‘tgani uchun jarimaga tortildi, u ichki ishlar bo‘limiga topshirilgan.
