Lukashenko 20 nafar siyosiy mahbusni afv etdi

Belarus rahbari Aleksandr Lukashenko farmon imzolab, 22 nafar shaxsni afv etdi. Bu haqda seshanba, 30 dekabr kuni uning matbuot xizmatiga yaqin “Pul pervogo” Telegram-kanali xabar qildi. Ozod etilganlarning 20 nafari avval “ekstremistik” moddalar bo‘yicha hukm qilingan. Huquq himoyasi bilan shug‘ullanuvchi “Vyasna” markazi ma’lumotiga ko‘ra, gap siyosiy mahbuslar haqida ketmoqda.

Ozodlikka 15 nafar ayol va 7 nafar erkak chiqadi, ulardan 11 nafarining voyaga yetmagan farzandlari bor. Afv etilganlarning ismlari ochiqlanmagan. Ular Belarusdan chiqarib yuborilgan-yo‘qmi — hozircha noma’lum. Lukashenko matbuot xizmati da’vo qilishicha, “ularning barchasi davlat rahbari nomiga afv etish haqida iltimosnoma bilan murojaat qilgan, aybini tan olgan va qilgan ishidan pushaymon bo‘lgan”.

2025 yil 13 dekabr kuni Aleksandr Lukashenko va Belarus bo‘yicha maxsus vakil Jon Koul boshchiligidagi AQSh delegatsiyasi o‘rtasidagi muzokaralardan keyin mamlakat hokimiyati 123 nafar siyosiy mahbusni ozod qilgan edi.

Ular orasida Belarus muxolifatining yetakchilaridan biri Mariya Kolesnikova, Belgazprombankning sobiq rahbari va 2020 yilgi prezidentlik saylovida nomzod bo‘lgan Viktor Babariko, shuningdek “Vyasna” huquq himoya markazi rahbari va Tinchlik bo‘yicha Nobel mukofoti laureati Ales Belyatskiy ham bo‘lgan. Ularning barchasi Belarus hududidan chiqarib yuborilgan.

“Vyasna” ma’lumotlariga ko‘ra, Belarusda 2024 yil iyul oyidan beri afv etish orqali 569 nafar siyosiy mahbus ozod qilingan. 2025 yilda afv etilgan siyosatchi Nikolay Statkevich mamlakatni tark etishdan bosh tortganidan keyin uni qaytadan koloniyaga qaytarishgan.