Jinoyat ko‘chasiga bir emas, bir necha marta kirib chiqqan, qonun oldida tegishli jazosini olib, bundan o‘ziga xulosa chiqarmagan Adiba Pirmanova (ism-familiyalar o‘zgartirilgan) tovlamachilik “kasbi”ni davom ettiradi. U fuqaro J.Otashova bilan uning tilla taqinchoqlari pulini ham oyda bo‘lib to‘lashga kelishadi va sotib oladi. Tilla buyumlar qo‘lga kiritilgandan keyin esa, ular naqd pulga sotiladi va mablag‘lar shaxsiy manfaatlar yo‘lida sarflanadi. J.Otashovaga berilgan va'dalar esa, va'daligicha qolib ketaveradi, deb yozadi “Huquq” gazetasi.

Ayol qilmishini davom ettirib, sherigi Zarifa Aruzeva bilan jinoiy til biriktiradi. Ular fuqaro H.Yaxshiboyevaning 42 million so‘mi bo‘lgan plastik kartochkasini yetti foiz evaziga naqd pul qilib beramiz, deb aldab olib, pullarni o‘z ehtiyojlari uchun sarflab yuborishadi.

Nukuslik Lobar Janabayeva ham tovlamachilik borasida dars beradiganlar toifasidan ekan. U odamlarga o‘zini “Markaziy bankda bo‘lim boshlig‘iman” deb tanishtiradi. “Toshkent-Nukus” yo‘nalishida yuk tashiydigan bir nechta avtomashinalarim bor”, deb odamlar orasida gap tarqatadi. L.Janabayevaning bu gaplaridan so‘ng ayrim sodda odamlar uning qarmog‘iga ilinishadi. Xususan, bu ayol fuqaro A.Karimboyevaga arzon un olib kelib berishga va'da berib, uning 40 mln. so‘m pulini firibgarlik yo‘li bilan qo‘lga kiritadi.

Yuqorida nomi keltirilgan tovlamachilarning barchasiga sud hukmi bilan qonuniy jazo tayinlandi.