11:35 / 15.09.2020
4513
O‘zbekiston maxsus xizmatlari hamkorlar bilan birgalikda MDH davlatlarida 20dan ortiq teraktlarning oldini oldi
Foto: Mudofaa vazirligi matbuot xizmati

2020 yilning 14 sentabr kuni «Terrorizm hamda unga olib boruvchi tajovuzkor ekstremizm va radikallashuvga qarshi samarali sheriklik» mavzusida Yevropada xavfsizlik va hamkorlik tashkilotining (YeXHT) yuqori darajadagi terrorizmga qarshi onlayn konferensiyasi bo‘lib o‘tdi.

TIV xabariga ko‘ra, tadbirda YeXHTning amaldagi raisi — Albaniya Yevropa va tashqi ishlar vaziri Gent Chakay, BMT bosh kotibi o‘rinbosari, tashkilotning Terrorizmga qarshi kurashish boshqarmasi rahbari Vladimir Voronkov, YeXHTga a'zo davlatlarning yuqori martabali vakillari ishtirok etdi.

Anjuman chog‘ida terrorizmga qarshi kurashish sohasida fuqarolik jamiyati va xususiy sektorning rolini oshirish orqali mazkur yo‘nalishdagi xalqaro va mintaqaviy hamkorlikni mustahkamlash masalalari muhokama qilindi.

Konferensiyada asosiy ma'ruzachilardan biri sifatida O‘zbekiston tashqi ishlar vaziri o‘rinbosari Sherzod Asadov ishtirok etib, u ishtirokchilarni mamlakatning terrorizm va ekstremizmga qarshi kurashish sohasidagi yutuqlari bilan tanishtirdi.

O‘zbekistonning o‘n yildan ortiq vaqt mobaynida o‘z hududida bitta ham terroristik harakatni amalga oshirishga yo‘l qo‘ymaganligi qayd etildi. MDH hududidagi hamkor maxsus xizmatlar bilan birgalikda 20dan ortiq teraktlarning oldi olindi.

Xavfsizlikni ta'minlash, jumladan xorijiy sayyohlar xavfsizligini ta'minlash sohasida O‘zbekiston uchinchi yildirki, ketma-ket eng xavfsiz mamlakatlar reytingida yetakchi o‘rinni egallab turgani ta'kidlandi.

Tadbir ishtirokchilari O‘zbekiston Respublikasi tomonidan terrorizmga qarshi kurashish bo‘yicha ko‘rilayotgan chora-tadbirlarni yuqori baholashdi, deyiladi xabarda. 

Top