Bugun kollej va texnikumlarga kirish imtihonlarining javoblari e'lon qilinadi

Oliy va o‘rta maxsus ta'lim vazirligi kollej va texnikumlarga kirish imtihonlarining javoblari bugun, 17 dekabrda e'lon qilinishini ma'lum qildi.

2020/2021 o‘quv yilida kollej va texnikumlarga o‘tkazilgan saralash imtihonlari (test sinovlari, yozma va kasbiy (ijodiy) imtihon) natijalarini 2 xil yo‘l bilan bilish mumkin.

“Abituriyentlar saralash imtihonlari natijalarini o‘zlari hujjat topshirgan ta'lim muassasalari orqali, test topshirgan abituriyentlar esa Davlat test markazining rasmiy veb-sayti orqali bilishlari mumkin”, – deb xabar bermoqda vazirlik.

Eslatib o‘tamiz, O‘zbekistondagi 201ta kollej va 185ta texnikumga jami 154 765ta kvota ajratilgan. Bu o‘rinlar uchun 260 021 nafar talabgor hujjat topshirgan. Saralash imtihonlari esa 20 noyabrdan 30 noyabrga qadar o‘tkazildi.