Vatikan dunyodagi mol-mulki haqidagi axborotni ilk bor taqdim qildi. Ushbu axborotga ko‘ra, ayni vaqtda Vatikan butun dunyoda 5 mingdan ko‘proq ko‘chmas mulk obektiga ega.
Vatikanning mol-mulki haqidagi ma'lumot Muqaddas taxt va uning mol-mulki boshqarmasining (APSA) 2020 moliyaviy yil uchun hisobotida keltirilgan.
APSA Vatikanning ko‘chmas mulki va investitsiyalarini boshqaruvchi tashkilot bo‘lib, u tomonidan e'lon qilingan hisobotda Vatikan Italiyada 4051ta va xorijda 1120ta ko‘chmas mulk obektiga egaligi ko‘rsatilgan.
Vatikanning Italiyadagi obektlarining 14 foizga yaqini bozor narxida, qolganlari esa pasaytirilgan narxda ijaraga berilgan.
Vatikan ixtiyoridagi ko‘chmas mulk obektlarining 40 foizga yaqini maktablar, monastirlar va davolash muassasalari hisoblanadi.
Bundan tashqari, Vatikan London, Jyeneva, Lozanna va Parijning nufuzli tumanlarida ko‘chmas mulkka ega.
