Yangiyo‘l shahrida akasining nomidagi MChJga bank kreditini o‘tkazib, talon-toroj qilgan bosh hisobchi aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.
Departamentning Yangiyo‘l shahar bo‘limi tomonidan “O‘zmilliybank” AJning Yangiyo‘l filiali murojaatiga asosan tergovga qadar tekshiruv o‘tkazilgan.
Unda, Yangiyo‘l filiali bosh hisobchisi J.M. kredit mablag‘larini o‘zlashtirish maqsadida, akasi J.ning nomiga “Z.B.” MChJni tashkil qilib, 11 nafar fuqaroning nomiga kredit hujjatlarini rasmiylashtirib, ularga ajratilgan 754 mln so‘mni dastlab “Z.B.” MChJ hisobraqamiga va u orqali plastik kartaga o‘tkazib, talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 179-moddasi (soxta tadbirkorlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
