Vazirlar Mahkamasining “O‘zbekistonning raqobatbardosh sanoat unumdorligi indeksida ko‘rsatkichlarini yaxshilash chora-tadbirlari to‘g‘risida”gi qarori loyihasi e’lon qilindi.
2022-2030 yillarda raqobatbardosh sanoat unumdorligi indeksida O‘zbekiston o‘rnini yaxshilash strategiyasi, 2022-2026 yillarda raqobatbardosh sanoat unumdorligi indeksida O‘zbekiston o‘rnini yaxshilash strategiyasini amalga oshirish bo‘yicha chora-tadbirlar dasturi va iqtisodiy faoliyat turlari umumdavlat tasniflagichi bo‘yicha yuqori va o‘rta-yuqori texnologiyali mahsulot ishlab chiqarishga ixtisoslashgan tarmoq va sohalarda faoliyat yurituvchi davlat va xo‘jalik boshqaruvi organlari ro‘yxati tasdiqlanadi.
Belgilanishicha:
Iqtisodiy taraqqiyot vazirligi, Investitsiyalar vazirligi hamda Tarmoq bozorlari va ishlab chiqarishda mehnat unumdorligi tadqiqotlari markazi bilan birgalikda BMT Sanoatni rivojlantirish tashkiloti tomonidan e’lon qilinadigan raqobatbardosh sanoat unumdorligi indeksi yillik hisobotlari asosida mas’ul vazirlik va idoralar hamda davlat va xo‘jalik boshqaruvi organlari bilan hamkorlikda hisobot rasmiy e’lon qilinganidan so‘ng bir oy muddatda past indikatorlar bo‘yicha tizimli kamchiliklarni bartaraf etish yuzasidan takliflarni ishlab chiqadi hamda Xalqaro reyting va indekslar bilan ishlash bo‘yicha respublika kengashi ishchi organlariga kiritib boradi;
respublika kengashi ishchi organlari indeksdagi past indikatorlarga mas’ul davlat organlari bo‘yicha soha va tarmoqlardagi mavjud kamchiliklarni bartaraf etish loyihalarini 2022-2026 yillarga mo‘ljallangan Yangi O‘zbekiston taraqqiyot strategiyasini amalga oshirishga qaratilgan har yillik davlat dasturlariga kiritadi.
2025 yil 1 sentabrga qadar Iqtisodiy taraqqiyot vazirligi indeks tarkibidagi indikatorlarga mas’ul davlat organlari bilan birgalikda strategiyani amalga oshirish ikkinchi bosqichi bo‘yicha 2027-2030 yillarga mo‘ljallangan chora-tadbirlar rejasi va indeks past ko‘rsatkichlar bo‘yicha ilmiy tadqiqot loyihalarini amalga oshirish dasturini o‘rnatilgan tartibda Vazirlar Mahkamasiga kiritadi.
Investitsiyalar vazirligi belgilangan davlat va xo‘jalik boshqaruvi organlari, Markaziy bank va tijorat banklari, Qoraqalpog‘iston Vazirlar Kengashi, viloyatlar va Toshkent shahar hokimliklari rahbarlari bilan birgalikda davlat investitsiya dasturlari hamda hududiy ijtimoiy-iqtisodiy rivojlantirish dasturlarini shakllantirishda, maxsus iqtisodiy zonalarda sanoat investitsiya loyihalarini amalga oshirishda qayta ishlash sanoatidagi o‘rta yuqori va yuqori texnologiyali mahsulotlar ulushi kamida 30 foizni tashkil etishiga alohida e’tibor qaratadi.
