Rossiya agressiyasiga qarshi kurashda Ukrainaga yordam berish zarur va «bu masalada shunchaki muqobil variant yo‘q», dedi Boris Pistorius.
Germaniya hukumati Leopard 2 asosiy jangovar tanklarini Kiyevga topshirishga qaror qildi, chunki Ukraina Rossiya agressiyasiga qarshi urushda qo‘llab-quvvatlanishi kerak va «bu masalada shunchaki muqobil variant yo‘q», deb ma’lum qildi Germaniya mudofaa vaziri Boris Pistorius. Uning ta’kidlashicha, Ukrainaga tanklar yetkazib berilishi Germaniyani urush qatnashchisiga aylantirmaydi. Barcha ittifoqchilar, jumladan, «amerikalik do‘stlar ham» birgalikda harakat qilyapti, Germaniya o‘z qarorida yolg‘iz emas va shuning uchun Rossiya prezidenti Vladimir Putinning asosiy raqibi emas, dedi Pistorius.
Mudofaa vazirligi rahbari, shuningdek, Ukrainaga zirhli texnika jo‘natgandan so‘ng, Bundesver zaxiralarini tezda to‘ldirish niyatida ekanini aytdi. Kelgusi haftada Germaniya mudofaa sanoati vakillari bilan muzokaralar o‘tkazish rejalashtirilgan. «Biz hozir zaxiralarni tez to‘ldirish uchun qo‘limizdan kelganini qilmoqdamiz», deb ishontirdi vazir.
25 yanvar kuni ertalab Germaniya kansleri Olaf Shols Germaniyaning Ukrainaga u uzoq vaqtdan beri so‘rab kelgan Leopard 2 tanklarini yetkazib berish niyatini rasman tasdiqladi. Birinchi bosqichda Berlin Kiyevga Bundesver zaxirasidan 14 ta Leopard 2 A6 tankidan iborat rota beradi. Shuningdek, u boshqa mamlakatlarga tanklarni Ukraina Qurolli kuchlariga reeksport qilish imkonini yaratadi.
Shols ta’kidlaganidek, vazifa Ukraina uchun ikkita tank batalonini tezda yig‘ishdir. Bundesver tank batalonining tarkibi odatda 44 ta tankni o‘z ichiga oladi. Shu tariqa, gap Ukrainaga yevropalik sheriklar tomonidan Leopard 2 tipidagi 90 ga yaqin jangovar mashinalarni yetkazib berish haqida ketayotgan bo‘lishi mumkin.
Ukraina ekipajlarini tayyorlash tez orada Germaniyada boshlanishi kerak. Yangi yordam paketiga o‘q-dorilar va tizimlarga texnik xizmat ko‘rsatish ham kiradi.
